ხვალ, 11 საათზე თბილისის საქალაქო სასამრთლოში ე.წ. ციანიდის საქმის განხილვა განახლდება. ხვალინდელ პროცესზე დაცვის მხარის ერთ-ერთი მთავარი მოწმის, კრიმინალური პოლიციის ხელმძღვანელის ყოფილი მოადგილის, ირაკლი ფირცხალავას დაკითხვა იგეგმება.
„ბრალდების მხარის აუდიო-ვიდეო ჩაანაწერების გამოკვლევის შემდეგ, რომელიც რამდენიმე საათში დასრულდება, დაცვის მხარის მოწმე, ირაკლი ფირცხალავა დაიკითხება. მისი განცხადებიდან გამომდინარე, რომელშიც ის ირაკლი მამალაძეს როგორც აგენტ-პროვოკატორ „პრესას“ მოიხსენიებს, ფირცხალავა ძალიან მნიშვნელოვანი მოწმეა. როგორც ჩანს, ირაკლი მამალაძეს უშიშროების სამსახურთან დიდი ხნის ურთიერთობები გააჩნია და შეიძლება, ის არაერთ პროვოკაციულ საქმეშიც იყოს ჩართული.
ფირცხალავა ირაკლი მამალაძესთან დაკავშირებით სასამართლოს სრულყოფილ ინფორმაციას მიაწოდებს. ეს დანაშაული კი არა, დანაშაულის პროვოცირება და წინასწარ დაგეგმილი იყო. ვნახოთ, ხვალ ირაკლი ფირცხალავა რას იტყვის“, - განუცხადა „ჯი-ეიჩ-ენ-ს“ გიორგი მამალაძის ადვოკატმა, მიხეილ რამიშვილმა.
ირაკლი ფირცხალავას გარდა, დაცვის მხარეს რამდენიმე მოწმე დარჩა დასაკითხი.
„გადასარევი მოწმეები გვყავდა, ისინი ბრალდების მხარემ მოიყვანა, მშვენიერ კითხვებზე მშვენიერი პასუხები მივიღეთ, დანარჩენზე თვითონ იმტვრიონ თავი“, - აცხადებს მიხეილ რამიშვილი.
რაც შეეხება იმას, დადგება თუ არა სამართლებრივი პასუხისმგებლობა პატრიაქრის დაცვის სამსახურის ყოფილი უფროსის, სოსო ოხანაშვილის და საპატრიარქოს უსაფრთხოების სამსახურის უფროსის ყოფილი მოადგილის, ტარას შავიშვილის წინააღმდეგ, როგორც ადვოკატი აცხადებს, ეს გამორიცხულია.
„რა მოიგონონ, კუდი რას მიაბან, აღარ იციან. პროკურატურას ფანტაზიის არანორმალური უნარი აქვს. რომელი სასულიერო პირი სოსო ოხანაშვილი ან ტარას შავშიშვილია? აქ არ იყო სოსო ოხანაშვილი? გერმანიიდან ხომ ჩამოვიდა და რა უნდოდა მის დაკავებას?.. ჯერ პატრიაქრის მოწამვლაზე დაიწყეს საუბარი, შემდეგ შორენა თეთრუაშვილზე გადავიდნენ, შემდეგ მეუფე იაკობსაც, მეუფე თეოდორესაც მოწამლავდაო, ამბობენ. მე მგონი, მამალაძეს მთელი მართლმადიდებლობის ამოხოცვას აბრალებენ“, -აცხადებს ადვოკატი.
ე.წ. ციანიდის საქმეზე განაჩენი სავარაუდოდ სექტემბრის თვეში დადგება.