„თუ ამერიკის ახალი ადმინისტრაციის კონცეფციაა „ამერიკა პირველ რიგში“, „შენების მოძრაობის“ კონცეფციაა „საქართველო პირველ რიგში“, - ამის შესახებ „შენების მოძრაობის“ ლიდერმა დავით უსუფაშვილმა აშშ-ის ვიცე-პრეზიდენტის, მაიკ პენსის ვიზიტთან დაკავშირებით განაცხადა.
უსუფაშვილი იმ ძირითად საკითხებს ასაჯაროებს, რომელთა შესახებაც ხვალ მაიკ პენსთან შეხვედრაზე ისაუბრებს.
„ამ მიზნების რეალიზებისთვის ორი ქვეყნის ინტერესები არის სრულ თანხვედრაში. შესაბამისად, ჩვენი საერთო პრიორიტეტია საქართველოსა და ამერიკას შორის გრძელვადიანი სტრატეგიული თანამშრომლობის გაღრმავება. ვისაუბრებ იმაზე, რომ საქართველოს მოქმედი და წინა ხელისუფლების დემოკრატიული პოტენციალი არ არის ის მაქსიმუმი, რაც ქართველ ხალხს გააჩნია. ჩვენ უახლოეს საპარლამენტო არჩევნებზე ამას დავამტკიცებთ. საამისოდ კი გვჭირდება ჩვენი ქვეყნის მეგობრების მეტი დახმარება, რათა საკონსტიტუციო თუ სხვა პროცესებში დაცული იყოს დემოკრატიის მაღალი სტანდარტები“, - აცხადებს დავით უსუფაშვილი.
შეგახსენებთ, რომ საქართველოს 2-დღიანი ვიზიტით ამერიკის შეერთებული შტატების ვიცეპრეზიდენტი მაიკ პენსი, მეუღლესთან ერთად დღეს ეწვევა.
