სასამართლოს ამ გადაწყვეტილების შემდეგ, სოზარ სუბარს რომ ჰქონდეს თავმოყვარეობა, ის უნდა გადადგეს, - ამის შესახებ ,,ევროპული საქართველოს“ წევრმა სერგო რატიანმა მიკაილ კადიევის საქმის შესახებ დღეს მიღებული გადაწყვეტილების კომენტირებისას განაცხადა.
,,ამ გადაწყვეტილების მერე სოზარ სუბარს თავმოყვარეობა რომ ჰქონდეს ის უნდა გადადგეს. სამი წლის განმავლობაში ის უარს ეუბნება ლტოლვილის სტატუსის მინიჭებაზე იმ მოტივით, რომ თითქოს რუსეთში არ არის ადამიანების უფლებების შელახვა, არ დევნიან კავკასიელებს, არ იდევნებიან ადამიანები რელიგიური ნიშნით და თითქოს ციხეში ის იქნებოდა დაცული. ეს არის სამარცხვინო რამე. სამი წლის განმავლობაში ორჯერ გაუუქმა სასამართლომ გადაწყვეტილება,’’ - განაცხადა სერგო რატიანმა.
თბილისის საქალაქო სასამართლომ ლტოლვილთა სამინისტროს დაავალა, მიკაელ კადიევისთვის ლტოლვილის სტატუსის მინიჭებაზე ხელახლა იმჯელოს.
დაღესტნის მკვიდრი კადიევი 2009 წელს ხასავ-იურტის რაიონის ადმინისტრაციის ხელმძღვანელის მკვლელობაშია ბრალდებული. საქართველოს შინაგან საქმეთა სამინისტრომ კადიევი რიზვან ომაროვთან ერთად 2012 წელს დააკავა. მათ ბრალი იარაღისა და ასაფეთქებელი ნივთიერებების უკანონო შენახვისთვის წაუყენეს. მას შემდეგ რუსეთი კადიევის მისთვის გადაცემას მოითხოვს, თუმცა ქართულ მხარეს ჯერ გადაწყვეტილება მიღებული არ აქვს.