„მიხეილ სააკაშვილისთვის უკრაინის მოქალაქეობის ჩამორთმევა არის უკრაინის ხელისუფლების გადაწყვეტილება და შესაბამისად, მე არც შეფასებასა და კომენტარებში არ შევალ“, - ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილმა განაცხადა.
მისივე აზრით, მომხდარს პოლიტიკური მოტივი არ აქვს და უკრაინის ხელისუფლებამ გადაწყვეტილება მხოლოდ სამართლებრივი მოცემულობით მიიღო.
როგორც ციხელაშვილმა ჟურნალისტებს განუცხადა, საქართველოდან მიხეილ სააკაშვილთან დაკავშირებით ახალი მტკიცებულებები არ გაგზავნილა.
"არანაირ ახალ მტკიცებულებებზე საუბარი არ არის. ჩემი ინფორმაციით, საქმის ვითარება უკვე დიდი ხანია ცნობილია. სამართლებრივი წარმოება, რომელიც მიმდინარეობს უკვე წლების განმავლობაში ეს არის მოცემულობა. აქ რაიმე სიახლეზე ვერ ვისაუბრებთ. რაც შეეხება სხვა ზომებს, რაც ხდება მიხეილ სააკაშვილთან დაკავშირებით, უკრაინის მოქალაქეობის ჩამორთმევას ვგულისხმობ, ეს არის უკრაინის ხელისუფლების გადაწყვეტილება და შესაბამისად, მე არც შეფასებასა და კომენტარებში არ შევალ. პოლიტიკურად ყოფილი პრეზიდენტის ფიგურა აქტუალური საქართველოში არ არის და შესაბამისად, ეს საკითხი არ გახლავთ პოლიტიკური. ბუნებრივია, ის სამართლებრივი მხარე, რომელიც აქვს ამ საქმეს, არის ცნობილი, მეტს ვერაფერს გეტყვით, არანაირი ახალი მტკიცებულებები არ არის და მე არ ვიცი, ვინ გააკეთა ეს განცხადება", - განაცხადა ქეთევან ციხელაშვილმა.
