რუსეთის ფედერაცია, უკანონო მილიტარიზაციის ინტენსიური პროცესის კვალდაკვალ, საქართველოს ოკუპირებული ტერიტორიების თანმიმდევრულ შთანთქმას ახორციელებს, რაც პირდაპირ სამხედრო საფრთხეს უქმნის საქართველოსა და რეგიონში არსებულ უსაფრთხოების გარემოს, - ამის შესახებ საქართველოს საგარეო საქმეთა მინისტრმა მიხეილ ჯანელიძემ ეუთო-ს არაფორმალურ მინისტერიალზე განაცხადა.
მისი თქმით, ოკუპანტი ძალა ცდილობს ამ რეგიონების საქართველოსგან კიდევ უფრო იზოლირებას ე.წ. ბორდერიზაციის უკანონო პროცესის გზით.
"ჩვენს შეშფოთებას კიდევ უფრო აღრმავებს მოსკოვის გამუდმებული უარი, საქართველოს მსგავსად, იკისროს ძალის გამოუყენებლობის ვალდებულება, ასევე ჟენევის დისკუსიებზე მისი ანტაგონისტური დამოკიდებულება ადგილზე უსაფრთხოების საერთაშორისო მექანიზმების შექმნასთან დაკავშირებით. ადამიანის უფლებათა მდგომარეობა ოკუპირებულ ტერიტორიებზე დღითიდღე უარესდება. უფრო მეტიც, ოკუპანტი ძალა ცდილობს ამ რეგიონების საქართველოსგან კიდევ უფრო იზოლირებას ე.წ. ბორდერიზაციის უკანონო პროცესის გზით. ეს პროცესი ახლაც გრძელდება", - განაცხადა მიხეილ ჯანელიძემ.
