საქართველოს პრეზიდენტის საერთაშორისო მდივანი თენგიზ ფხალაძე სერგეი ლავროვს პასუხობს და აცხადებს, რომ რუსეთის საგარეო საქმეთა მინისტრის სერგეი ლავროვისა და ოკუპირებული სამხრეთ ოსეთის დე ფაქტო საგარეო საქმეთა მინისტრის დიმიტრი მედოევის შეხვედრა საერთაშორისო ურთიერთობების იმიტაციაა, რომელსაც რეალურ საერთაშორისო ურთიერთობებთან არანაირი კავშირი არ აქვს.
თენგიზ ფხალაძის განცხადებით, რეალობა არის ის, რომ არსებობს საქართველოს ოკუპირებული რეგიონები, ოკუპანტი ძალა რუსეთის ფედერაცია და ნებისმიერი ე. წ. შეთანხმებას, რომელიც იქნება გაფორმებული მათ შორის არანაირი საერთაშორისო ძალა არ აქვს.
„გუშინ ჩვენ მოვისმინეთ მორიგი ბრალდებები იმასთან დაკავშირებით, რომ თურმე საქართველო ძაბავს სიტუაციას რეგიონში, საქართველოს და ნატო-ს თანამშრომლობა ხელს უშლის რეგიონში სტაბილურობას.
ძალიან საშიშია ასეთი განცხადებები, იმ ფონზე, როდესაც რუსეთის ფედერაცია დგამს ნაბიჯებს საქართველოს ტერიტორიის მიტაცებისაკენ, მცოცავი ოკუპაციისაკენ.
ეს არის უაღრესად შემაშფოთებელი და თუკი რაიმე ძაბავს სტაბილურობას, პრობლემას უქმნის რეგიონში სტაბილურობას ეს არის სწორედ რუსეთის ფედერაციის მიერ ოკუპირებული ტერიტორიების მილიტარიზაცია და ის მცოცავი ოკუპაცია, რომელიც ხორციელდება საქართველოს ტერიტორიაზე“, - განაცხადა თენგიზ ფხალაძემ.
მისი განცხადებით, ძალიან მნიშვნელოვანია, რომ საქართველოს პარტნიორებმა და საერთაშორისო თანამეგობრობამ კიდევ ერთხელ ძალიან მკაცრად და ძალიან მკაფიოდ დააფიქსირონ პოზიცია აღნიშნულთან დაკავშირებით.
„ამ საკითხზე საქართველოს პრეზიდენტმა საკმაოდ ვრცლად ისაუბრა საბერძნეთის ელჩთან და დღეს შემდგომი შეხვერდაც აღმოსავლეთ პარტნიორობის ელჩებთან სწორედ ძირითადად ამ საკითხებს დაეთმობა.
უაღრესად მნიშვნელოვანია, რომ ერთიანი პოზიცია დაფიქსირდეს საქართველოს ტერიტორიებზე მცოცავი ოკუპაციისა და ფარული ანექსიის მიუღებლობასთან დაკავშირებით.
ვიტყვი იმას, რომ საქართველოს და ნატო-ს თანამშრომლობა მხოლოდ და მხოლოდ სტაბილურობის მომტანია რეგიონში, მხოლოდ და მხოლოდ საერთაშორისო თანამშრომლობის ხელშემწყობი ფაქტორი და მიმართულია საქართველოს მოსახლეობის კეთილდღეობისაკენ და მათ შორის ოკუპირებულ ტერიტორიაზე მცხოვრები ჩვენი თანამემამულეების კეთილდღეობისაკენ“, - განაცხადა თენგიზ ფხალაძემ.
