ამ უკანონო ქმედებების შესახებ გაერო-ს უშიშროების საბჭო და გენერალური ასამბლეა ინფორმირებული არიან და ველით, რომ ამას შესაბამისი ადეკვატური რეაგირება და შეფასებები მოჰყვება არა მხოლოდ გაერო-ს, არამედ ევროკავშირის მხრიდან, - ამის შესახებ საგარეო საქმეთა მინისტრის მოადგილე, დავით ზალკალიანმა განაცხადა.
მისი თქმით, რეგიონში მიმდინარე პროცესი 2008 წლის ოკუპაციის შედეგია და ეს საკითხი საქართველოს დღის წესრიგის ერთ-ერთი მთავარი პრიორიტეტია.
„ჩვენ ამაზე მყისიერი რეაგირება გვაქვს და ბოლო პერიოდში მიმდინარე პროცესებთან დაკავშირებით, საგარეო უწყებამ და დიპლომატიურმა მისიებმა საერთაშორისო ორგანიზაციები საქმის კურსში ჩააყენეს. მათ შორის, ჩვენი ევროპელი და ამერიკელი პარტნიორები.
ბოლო დღეების განმავლობაში, ოკუპაციის ხაზის გასწვრივ მიმდინარე უკანონო ქმედებებთან დაკავშირებით, ეუთო-ს, ევროკაკავშირს, გაერო-სა და ევროსაბჭოს დეტალურად მიაწოდეს ინფორმაცია და ჩვენი პარტნიორები ინფორმირებულები არიან“, - განაცხადა ზალკალიანმა, რომელმაც აქვე აღნიშნა, რომ ბოლო პერიოდში, ქართული მხარის მხრიდან საქართველოს მცოცავ ოკუპაციასთან დაკავშირებით უპრეცედენტო აქტივობა იყო და ქვეყანამ ძალიან სერიოზული მხარდაჭერა მოიპოვა, რაც შესაბამის განცხადებებში, გადაწყვეტილებებსა და იმ რეზოლუციებში გამოიხატა, რომლებიც მიღებული იქნა გაერო-ს, ევროპის საბჭოსა და ეუთო-ს საპარლამენტო ასამბლეის ფორმატებში.
„რაც მთავარია, ბოლო ექვსი თვის განმავლობაში, გაერო-ს უშიშროების საბჭოზე ეს საკითხი სამჯერ იყო განხილული. ეს საკითხი ჩვენი ყოველდღიური საზრუნავის მთავარი პრიორიტეტია და მომავალშიც ძალიან აქტიურად გავაგრძელებთ საქმიანობას იმისთვის, რომ საერთაშორისო თანამეგობრობამ ეს უკანონო ქმედებები ადეკვატურად უნდა შეაფასოს.
ბოლო პერიოდში, ამის შესახებ გაერო-ს უშიშროების საბჭოსა და გენერალურ ასაბლეას არა მხოლოდ ვაუწყეთ, არამედ გაერო-ს უშიშროების საბჭოს დებატებში მონაწილეობა უშუალოდ საგარეო საქმეთა მინისტრმაც მიიღო“, - დასძინა ზალკანიანმა.
