მიხეილ ჯანელიძემ სამოქალაქო საზოგადოების და მედიის წარმომადგენლებთან გამართულ მორიგ სამუშაო შეხვედრაზე ბოლო 3 თვის განმავლობაში სამინისტროს მიერ განხორციელებულ საქმიანობა შეაჯამა.
საგარეო საქმეთა მინისტრმა ვრცლად ისაუბრა საგარეო პოლიტიკის მიმართულებით მიღწეულ მნიშვნელოვან შედეგებზე, სამინისტროს საქმიანობაზე, როგორც ევროპული და ევრო-ატლანტიკური ინტეგრაციის, ასევე სუვერენიტეტისა და ტერიტორიული მთლიანობის უზრუნველყოფის მიმართულებით. მიხეილ ჯანელიძემ ყურადღება გაამახვილა ორმხრივ და მრავალმხრივ დიპლომატიაზე, ეკონომიკური და კულტურული დიპლომატიის მიმართულებით გადადგმულ ნაბიჯებსა და მნიშვნელოვან მიღწევებზე. საგარეო უწყების ხელმძღვანელმა ამომწურავი ინფორმაცია მიაწოდა დისკუსიის მონაწილებს ამერიკის შეერთებულ შტატებთან სტრატეგიული პარტნიორობის, დაბალანსებული რეგიონული პოლიტიკის, საზღვარგარეთ საქართველოს მოქალაქეების უფლებების დაცვისა და დიასპორასთან ურთიერთობების განმტკიცების კუთხით გატარებული ღონისძიებების შესახებ.
შეხვედრის დასასრულს მიხეილ ჯანელიძემ აღნიშნა, რომ მსგავსი რეგულარული ხასიათის შეხვედრებით საფუძველი ჩაეყარა ძალიან კარგ და საჭირო ტრადიციას, რომელიც შემდგომშიც გაგრძელდება და საშუალებას მისცემს როგორც საგარეო საქმეთა სამინისტროს, ასევე სამოქალაქო საზოგადოების წარმომადგენლებსა და ჟურნალისტებს უკეთ და მჭიდროდ ითანამშრომლონ:
„3 თვე დიპლომატიაში არ არის ძალიან გრძელი პერიოდი, თუმცა მაინც ვთვლი, რომ იმ რთულ და სწრაფად ცვალებად გარემოში, როგორშიც ჩვენ გვიწევს ცხოვრება, ასეთ მოკლე პერიოდშიც ბევრ საინტერესო განვითარებას აქვს ადგილი. ამიტომ, ვცდილობ ჩვენი რეგულარული შეხვედრები გამოვიყენო საიმისოდ, რომ მაქსიმალურად მოგაწოდოთ ინფორმაცია სამინისტროს მიერ განხორციელებული საქმიანობის შესახებ და ამასთან, ერთად ვიმსჯელოთ ქვეყნის საგარეო პოლიტიკის მიზნებზე და მათი მიღწევის გზებიც ერთად დავსახოთ",- განაცხადა საგარეო საქმეთა მინისტრმა.
საგარეო უწყების ხელმძღვანელის რიგით მეორე შეხვედრა მედიის და სამოქალაქო საზოგადოების წარმომადგენლებთან 6 ივლისს სასტუმრო "მუზეუმში" გაიმართა.
