სტრასბურგში ვიზიტით მყოფი საქართველოს პარლამენტის თავმჯდომარე ევროპარლამენტისადმი საქართველოს, მოლდოვის რესპუბლიკისა და უკრაინის პარლამენტების ერთობლივ მიმართვას ეხმაურება.
ირაკლი კობახიძემ, რომელიც ერთობლივი მიმართვის ინიციატორია, განაცხადა, რომ მნიშვნელოვანია, აღმოსავლეთ პარტნიორობის სამიტზე, სადაც ქვეყნების ევროპული პერსპექტივის საკითხები განიხილება, მათ მიმართ მხარდაჭერა კიდევ ერთხელ დაფიქსირდეს.
„წელს იმართება აღმოსავლეთ პარტნიორობის სამიტი, სადაც ჩვენი ევროპული პერსპექტივის საკითხები განიხილება. პირადად ჩემი ინიციატივით, სამმა სპიკერმა-საქართველოს, მოლდოვისა და უკრაინის პარლამენტის თავმჯდომარეებმა მივმართეთ ერთობლივი წერილით ჩვენს ევროპელ მეგობრებს იმისთვის, მათი მხარდაჭერა კიდევ ერთხელ დაფიქსირდეს. ჩვენთვის ძალიან მნიშვნელოვანია, რომ ამ სამიტზე კიდევ ერთხელ დაფიქსირდეს მხარდაჭერა ჩვენი ევროპული პერსპექტივის მიმართ და ასევე, ძალიან მნიშვნელოვანია ის, რომ ჩვენ ერთობლივი ძალისხმევით, ერთობლივი წერილით მივმართეთ ჩვენს ევროპელ მეგობრებს“,- განაცხადა საქართველოს პარლამენტის თავმჯდომარემ.
საქართველოს, მოლდოვას და უკრაინის პარლამენტები ევროპარლამენტს, აღმოსავლეთ პარტნიორობის სამიტის წინ, მათი მხარდამჭერი რეზოლუციის მიღებისკენ მოუწოდებენ. ამის შესახებ აღნიშნულია საქართველოს პარლამენტის, მოლდოვის რესპუბლიკის პარლამენტისა და უკრაინის ვერხოვნა რადას ერთობლივ განცხადებაში.
სამი ქვეყნის საკანონმდებლო ორგანო მიიჩნევს, რომ რეზოლუციაში ევროპარლამენტმა კიდევ ერთხელ უნდა მოუწოდოს ევროპის საბჭოს, სამ ასოცირებულ ქვეყანას ევროკავშირის ხელშეკრულების 49-ე მუხლის თანახმად, ევროკავშირის წევრობის პერსპექტივა გაუხსნას.
