საქართველოს ენერგეტიკის მინისტრი კახი კალაძე თანამდებობას ტოვებს. ამის შესახებ კახი კალაძემ „ექსპო-ჯორჯიაში“ 2013-2017 წლების საქმიანობის შეჯამებისას განაცხადა.
მისი თქმით, ამოქმედდა გენერაციის 21 ობიექტი, მათ შორის 18 ჰიდროელექტროსადგური, ორი თბოელექტროსადგური და ქარის ელექტროსადგური „ქართლი“.
კალაძის ინფორმაციით, ობიექტებში მილიარდ 186 მილიონი დოლარის ინვესტიცია განხორციელდა, სადგურების სიმძლავრე კი 782,97 მეგავატია.
კახი კალაძემ იმ სოფლების სია წარმოადგინა, რომლებსაც ბოლო წლებში ელექტროენერგიის მიწოდება აღუდგა.
უშუქო სოფლების ჩამონათვალში 30 დასახლებაა: ჭიაურა, ღართა, გოსტიბე, ბევრეთი, ზედა ქსოვრისი, გრძელველი, ზემო ლეთეთი, უტყის უბანი, ჭერემი, კაწალხევი, სოგუთლო, ცხავერი, ოქროსოფელი, მაგლოანთუბანი, ნოჯა, კოშკასყელი, ნოჯიკეთი, ქვემო ღარისწყალი, ზემო ღარისწყალი, კარსანი, ჩონთო, ნატანები, მუცო, ბავარი, მანანაური, ცხუმალდი, ხაჩეში, ლელუბანი, შროშა და ქვემო ახალშენი.
კალაძის თქმით, თანამშრომლებს მსგავსი სოფლების მოძიება დაავალა, შედეგად კი ეს პროექტები განხორციელდა.
პრეზენტაციას სახელწოდებით „ენერგეტიკული (რ)ევოლუცია“ მთავრობის, ენერგეტიკული კომპანიების წარმომადგენლები, ინვესტორები და ექსპერტები ესწრებიან.
"თანამდებობას ვტოვებ და ყველაფერს გავაკეთებ, რომ ახალ პოზიციაზე წარმატებული ვიყო", - განაცხადა კახი კალაძემ.
როგორც ცნობილია, ის "ქართულმა ოცნებამ" თბილისის მერობის კანდიდატად წარადგინა.
