მზად ვართ ჩავერთოთ ამ კონსულტაციაში, ჩვენთვის ძალიან მნიშვნელოვანია, რომ შედგეს საერთო კონსენსუსი დოკუმენტთან დაკავშირებით და ამისთვის ”ქართული ოცნება” ყველაფერს გააკეთებს, - ამის შესახებ საქართველოს პარლამენტის თავმჯდომარე ირაკლი კობახიძემ სტრასბურგში განაცხადა, სადაც ვიზიტით იმყოფება.
მისი თქმით, "ქართული ოცნება" საკონსტიტუციო რეფორმასთან დაკავშირებით ნებისმიერი ტიპის კონსულტაციებს მიესალმება.
მისივე განცხადებით, სხვა რეფორმებთან ერთად სტრასბურგში შეხვედრებზე საუბარი ეხება საკონსტიტუციო ცვლილებებს.
”შეხვედრები გავმართეთ პოლიტიკური ჯგუფების წარმომადგენლებთან, როგორც სიოციალისტური ჯგუფის, ისე EPP-ის წარმომადგენლებთან. შეხვედრა და დისკუსია გაიმართა სხვადასხვა საკითხზე, მათ შორის საკონსტიტუციო ცვლილებებზე, რომელიც საქართველოში მიმდინარეობს. კიდევ მრავალი შეხვედრაა დაგეგმილი, სადაც ვისაუბრებთ საქართველოში მიმდინარე რეფორმებზე, მათ შორის საკონსტიტუციო ცვლილებებზე”, - განაცხადა პარლამენტის თავმჯდომარემ.
