სამწუხაროდ, გიორგი მარგველაშვილი ისე ტოვებს ერთ წელიწადში ამ თანამდებობას, რომ ის ალბათ ვეტოების პრეზიდენტად დარჩება, მან ძალიან კარგად იცის, რომ ჩვენ შეგვიძლია ვეტოს დაძლევა, მაგრამ ასეთი პირი უჩანს, რომ "იქნება ამით მაინც ცოტა შეგაწუხოთ", - ამის შესახებ საპარლამენტო უმრავლესობის წევრმა ნუკრი ქანთარიამ დღეს გამართილ პრესკონფერენციაზე კონსტიტუციის პროექტზე საუბრისას განცხადა.
მისი თქმით, საკონტიტუციო ცვლილებებზე მუშაობისას პირველი დიდი შეცდომა იყო პრეზიდენტის მხრიდან. მისი თქმით, პრეზიდენტმა პირველი განხეთქილების მარცვალი ჩააგდო, როცა აბსოლუტურად ლოგიკის გარეშე მოინდომა თანათავმჯდომარეობა.
"ყველა ვთანხმდებოდით, რომ კონსტიტუცია იყო შესაცვლელი. გაცილებით უკეთესი ტექსტი რომ მივიღეთ, მგონი ესეც არ არის სადაო. კონსტიტუციის პროცესი წავიდა ძალიან დიდი შემოცდომებითა და ხარვეზებით. მე შორს ვარ იმ აზრისგან, რომ მხოლოდ მხოლოდ ოპონენტების მხრიდან იყო და ჩვენი მხრიდან არ იყო ეს შეცდომები. პირველი დიდი შეცდომა იყო პრეზიდენტის მხრიდან, პრეზიდენტმა პირველი განხეთქილების მარცვალი ჩააგდო, როცა აბსოლუტურად ლოგიკის გარეშე მოინდომა თანათავმჯდომარეობა. ისიც კი უნდოდა, რომ პრეზიდენტის სასახლეში ყოფილიყო ეს პროცესი. შემდეგ მან არ წარგზავნა თავის წარმომადგენლები კომისიაში, დაიწყო პარალელური პროცესი - "კონსტიტუცია ყველასია". ამ ყველაფერმა მგონი საკმაოდ დააზარალა პროცესი", - განაცხადა ქანთარიამ.
ქანთარიას განცხადებით, პრეზიდენტის შეთავაზება, რომ პროცესი თავიდან დაიწყოს, გამორიცხულია.
"უკან დაბრუნება, რასაც ჩვენ პრეზიდენტი გვთავაზობს, მე პირადად აბსოლუტურად გამორიცხულად მიმაჩნია. ეს ნიშნავს საკითხის ჟეჟვას. ყველა ვთანხმდებით, რომ კონსტიტუციის ტექსტი არის ძალიან კარგი, იდეალური არაფერია. მეორე მოსმენის დროს, როდესაც ბოიკოტის რეჟიმში გადავიდნენ ოპოზიციური პარტიები, ჩვენ ძალიან დაწვრილებით განვიხილეთ ყველა მუხლი და შევიდა ძალიან საინტერესო ცვლილებები", - განაცხადა ნუკრი ქანთარიამ, რომელმაც აქვე აღნიშნა, რომ "ქართული ოცნების" შეცდომა ის იყო, რომ ვიდრე საკითხი განხილვებზე გავიდოდა და პროექტი შემუშავდებოდა, ძირითად პრინციპულ საკითხებზე ჯერ გუნდში უნდა შეთანხმებულიყვნენ.
