მძიმეა, ყოველდღე იცოდე, რომ შენს მოქალაქეებს ძალიან ბევრი სირთულე აქვს და შენ არ გაქვს შესაძლებლობა, ეს სირთულეები გადაჭრა, მე ამ სიმძმით ყოველდღიურად ვხოვრობ, - ამის შესახებ საქართველოს პრეზიდენტმა გიორგი მარგველაშვილმა "რუსთავი 2"-ის გადაცემა "არჩევანში" განაცხადა.
პრეზიდენტის განცხადებით, პირველ წელიწადს, როდესაც „ქართულმა ოცნებამ“ გაიმარჯვა, ბევრი საკითხი ძალიან იმედისმომცემი იყო.
„ძალიან დიდი იმედები მქონდა პირადად მე და ამ პროცესში ჩემი მონაწილეობაც განპირობებული იყო იმით, რომ ჩვენ ახლა მივცემთ ქვეყანას ძალიან ბევრ გამოსავალს. ილუზია იმასთან დაკავშირებით, რომ საქართველო 2 წელიწადში გახდებოდა შვეიცარია, ნაკლებად მქონდა", - განაცხადა გიორგი მარგველაშვილმა.
მისივე თქმით, არც თავდაპირველად ეგონა, რომ რუსეთთან ურთიერთობა ძალიან სწრაფად დალაგდებოდა, თუმცა იმედი ჰქონდა, რომ ევროინტეგრაციის ფონზე უკეთესი ნაბიჯები გადაიდგმებოდა.
გიორგი მარგველაშვილის თქმით, მისთვის პრეზიდენტის ვალდებულების შესრულება ცოტა რთული იყო, რადგან ფიცის დადების შემდეგ, მისი უფლებები შეიზღუდა.
„მე ვცდილობდი, რომ ჩემი ვალდებულება მაქსიმალურად შემესრულებინა. ეს ვალდებულება ცოტა რთული იყო იქიდან გამომდინარე, რომ კონსტიტუცია შეიცვალა", - განაცხადა პრეზიდენტმა, რომელმაც პრეზიდენტის არჩევის წესზე საუბრისას ხაზგასმით აღნიშნა, რომ „დემოკრატიულ საზოგადოებაში ძირითადი შეკვეთის მიმცემი არის ხალხი და საზოგადოება“.
მან აქვე აღნიშნა, რომ საკონსტიტუციო ცვლილებების განხილვის პროცესში პოლიტიკოსები, არასამთავრობოები და საზოგადოება ისეთ საკითხებზე კამათობს, რომლებზე საუბარიც ზედმეტია.
