გროზნოს ცენტრში ტერორისტული აქტი მოხდა. ტერორისტმა თვითმკვლელმა თავი აიფეთქა. წინასწარი ინფორმაციით, არის მსხვერპლი და არიან დაჭრილები.
"წინასწარი ინფორმაციით, ასაფეთქებელი მოწყობილობა მოქმედებაში ტერორისტმა თვითმკვლელმა მოიყვანა, რომელიც მილიციის თანამშრომლებს მიუახლოვდა. მილიციის თანამშრომლები ამ დროს გროზნოს ცენტრიდან ოდნავ მოშორებით მდებარე თეატრალურ მოედანზე მორიგეობდნენ", _ იუწყება რუსული მედია.
მათი ინფორმაციით, აფეთქების შედეგად გარდაიცვალა ერთი ადამიანი და ათი დაიჭრა.
აღნიშნული ფაქტის ირგვლივ სხვადასხვა ინფორმაცია ვრცელდება. კერძოდ, ჩეჩნეთის პრეზიდენტი რამზან კადიროვი აცხადებს, რომ დღეს საღამოს ჩეჩენმა სამართალდამცავებმა ტერაქტის განხორციელება აღკვეთეს.
"მას შემდეგ, რაც ჩეჩენმა სამართალდამცავებმა საეჭვო საქციელის ადამიანი გააჩერეს და საბუთები მოსთხოვეს, მან თავი აიფეთქა. დაჭრილია ხუთი მილიციელი", _ აცხადებს კადიროვი.
მისი თქმით, ამ დროს აფეთქების ადგილის ახლოს თეატრალურ საკონცერტო დარბაზში კონცერტი უნდა გამართულიყო.
"თუმცა კონცერტი არ გადაიდო და მე ამჟამადაც საკონცერტო დარბაზში ვიმყოფები", _ განაცხადა კადიროვმა.
