თბილისის მერობის კანდიდატი ზაალ უდუმაშვილი ვაკის რაიონის ამომრჩეველს შეხვდა და "ნაციონალური მოძრაობის" თბილისის მაჟორიტარი დეპუტატობის კანდიდატი კოტე იოსელიანი წარუდგინა. კანდიდატები პირადად გაეცნენ ვაკის რაიონის პრობლემებს და არჩევნებში გამარჯვების შემთხვევაში მათ გადაჭრას დაპირდნენ. მრგვალ ბაღში გამართულ შეხვედრაზე, ძირითად საკითხებად ქაოტური ურბანული პროექტები, მოუწესრიგებელი ტრანსპორტისა და პარკირების საკითხები დასახელდა.
„გარემო, რაც დღეს არის ვაკეში, ნარმანიას ყაიდაზე გადაკერებული მთელი ქალაქი, ეს არის კატასტროფა, ეს არის უმძიმესი მდგომარეობა რაც დღეს ამ უბანშია. ნებისმიერი მიმართულებით, ეს არის ქაოტური ურბანული პროექტები, ეს არის მოუწესრიგებელი ტრანსპორტი და ძალიან დაქვეითებული და გაფუჭებული უბანი, რომელსაც დაუყოვნებლივ სჭირდება შველა,“ - განაცხადა კოტე იოსელიანმა.
