საპარლამენტო უმრავლესობის წევრმა ნუკრი ქანთარიამ ოპოზიციონერ დეპუტატ რომან გოცირიძეს კუპონები მოუტანა და საპარლამენტო ტრიბუნიდან მისი ეროვნული ბანკის ხელმძღვანელობის პერიოდი გაახსენა.
„გაგახსენებთ იმ დროს, საქართველოს ყველა მოქალაქე მილიონერები რომ გახდნენ და ბატონო რომან, ალბათ, გესმით, რომ ამაზე დიდს ვერაფერს გააკეთებთ. მე წამოგიღეთ თქვენ რაც მაშინ საქართველოს მიეცით, აი, ეს არის მილიონები და როდესაც მოგინდებათ ფინანსებთან დაკავშირებული კრიტიკული გამოძახილი, იქნებ, ეს გაიხსენოთ და იყოთ თავმდაბალი“ - მიმართა ქანთარიამ გოცირიძეს და სცადა კუპონები მისთვის გადაეცა, თუმცა ოპოზიციონერი დეპუტატი პარლამენტის სხდომათა დარბაზში არ იმყოფებოდა.
