მოხდა უპრეცედენტო შემთხვევა და მსოფლმხედველობრივად განსხვავებული ოპოზიციური სპექტრი შეთანხმდება იმაზე, რომ საკონსტიტუციო ცვლილებათა პაკეტზე ბევრი კითხვის ნიშანი არსებობს, რის გამოც, უნდა მოხდეს მისი პარლამენტიდან გაწვევა, - ამის შესახებ ვიცე-სპიკერმა, „პატრიოტთა ალიანსის“ ლიდერმა ირმა ინაშვილმა ჯანი ბუკიკიოსთან შეხვედრის შემდეგ ოპოზიციურ პარტიებთან ერთობლივ პრესკონფერენციაზე განაცხადა. მისივე თქმით, სამწუხაროა, რომ ვენეციის კომისიის თავმჯდომარე პირდაპირ აყენებს საკონსტიტუციო ცვლილებების ლეგიტიმაციის საკითხს.
,,ჩვენთან საუბრისას, ჯანი ბუკიკიომ არაერთხელ განაცხადა, რომ დგება ლეგიტიმაციის საკითხი ამ კონსტიტუციის. ჩვენ ვიმუშავებთ და შევთანხმდებით იმაზეც, როგორ უნდა მოხდეს ამ პროექტის გაწვევა პარლამენტიდან. ამასთან დაკავშირებითაც, ოპოზიციური პოლიტიკური სპექტრი იქნება თანამოაზრე და ჩვენ შევთანხმდებით იმაზე, რომ ხელისუფლებასთან დიალოგისას ერთ-ერთი მთავარი თემა იყოს ამ პროექტის პარლამენტიდან გაწვევა. რაღაცას ხელისუფლება დათმობს, რაღაცას - ოპოზიცია ამ ქვეყნის და ქართული დემოკრატიის სასარგებლოდ. იმედს ვიტოვებთ, რომ ხელისუფლება წამოვა ამ დიალოგზე, ოპოზიცია ამისთვის მზადაა”, - აღნიშნა ირმა ინაშვილმა.
