“როდესაც საქართველოს საკონსტიტუციო სასამართლო განვითარების მესამე ათწლეულის საწყის ეტაპზეა, იგი სარგებლობს პოლიტიკური დამოუკიდებლობის მაღალი ხარისხით”, - ამის შესახებ საქართველოს პარლამენტის თავმჯდომარემ ირაკლი კობახიძემ ბათუმში, ევროპის საკონსტიტუციო სასამართლოების მე-17 კონგრესზე სიტყვით გამოსვლისას განაცხადა.
მისივე თქმით, 2012 წელს პოლიტიკური ვითარების ცვლილება პირდაპირ აისახა სასამართლო სტატისტიკაზე.
„თუ 2010-12 წლებში საქართველოს საკონსტიტუციო სასამართლოში წელიწადში საშუალოდ 20 საქმე შედიოდა, გასულ წელს ამ მაჩვენებელმა 158 შეადგინა, ანუ რვაჯერ გაიზარდა სასამართლოში მიმართვიანობის მაჩვენებელი. ანალოგიურად, რადიკალურად გაიზარდა განხილულ და მოსარჩელეთა სასარგებლოდ გადაწყვეტილ საქმეთა სტატისტიკა.
დღეს, როდესაც საქართველოს საკონსტიტუციო სასამართლო განვითარების მესამე ათწლეულის საწყის ეტაპზეა, იგი სარგებლობს პოლიტიკური დამოუკიდებლობის მაღალი ხარისხით. საქართველოს საკონსტიტუციო სასამართლოს დამოუკიდებლობა უნდა იყოს ხელისუფლების, განსაკუთრებით კი პარლამენტის საგანგებო ზრუნვის საგანი, რადგან, როგორც უკვე აღვნიშნეთ, სწორედ საკონსტიტუციო სასამართლო ქმნის უმნიშვნელოვანეს გარანტიას ქვეყანაში სამართლებრივი სახელმწიფოს და დემოკრატიის პრინციპების რეალიზებისათვის.
საქართველოს საკონსტიტუციო სასამართლოს დამოუკიდებლობისა და ქმედითი ფუნქციონირების უზრუნველყოფის თვალსაზრისით, განსაკუთრებული აღნიშვნის ღირსია საკონსტიტუციო რეფორმა, რომელსაც საქართველოს პარლამენტი, ვენეციის კომისიასთან მჭიდრო თანამშრომლობით ამჟამად ახორციელებს.
საკონსტიტუციო რეფორმის ფარგლებში, დგინდება საქართველოს პარლამენტის მიერ საკონსტიტუციო სასამართლოს მოსამართლეთა კვალიფიციური უმრავლესობით არჩევის წესი; რაც, ბუნებრივია, დადებითად აისახება საკონსტიტუციო სასამართლოს დამოუკიდებლობის ხარისხზე, ასევე იზრდება საქართველოს საკონსტიტუციო სასამართლოს უფლებამოსილებები: კერძოდ, გენერალურ პროკურორს, ეროვნული ბანკის საბჭოს და გენერალურ აუდიტორს ენიჭებათ საკონსტიტუციო სასამართლოში სარჩელის შეტანის უფლებამოსილება; კონსტიტუციის დონეზე მყარდება კონკრეტული ნორმათა კონტროლის პროცედურა; კონსტიტუციის ახალი რედაქცია მოითხოვს კონსტიტუციური მართლმსაჯულების საკითხთა ორგანული კანონით მოწესრიგებას და ა.შ.
განსაკუთრებული აღნიშვნის ღირსია, რომ კონსტიტუციის ახალი რედაქციით მნიშვნელოვნად იზრდება ადამიანის უფლებების დაცვის სტანდარტი, რაც ძალზე პოზიტიურად აისახება კონსტიტუციური მართლმსაჯულების პრაქტიკაზე საქართველოში“,- განაცხადა კობახიძემ და დასძინა, რომ საქართველოს პარლამენტი მოწოდებულია, მაქსიმალური წვლილი შეიტანოს საქართველოს საკონსტიტუციო სასამართლოს შემდგომი განვითარებისა და მისი დამოუკიდებლობის განმტკიცების საქმეში.
„კიდევ ერთხელ მინდა გამოვხატო კმაყოფილება იმ ფაქტით, რომ დღეს ჩვენი ქვეყანა და საქართველოს საკონსტიტუციო სასამართლო მასპინძლობს ამ უმნიშვნელოვანეს, წარმომადგენლობით კონგრესს, რომელიც ქმნის შესანიშნავ პლატფორმას სამართლებრივ სივრცეში საკონსტიტუციო სასამართლოს როლზე მსჯელობისათვის“,- აღნიშნა ირაკლი კობახიძემ.