ჩვენ არ მივიღებთ მონაწილეობას რიგგარეშე სხდომებში და ამ პროექტის დაჩქარებულ რეჟიმში განხილვაში, - ამის შესახებ „პატრიოტთა ალიანსის“ ლიდერმა, ირმა ინაშვილმა განაცხადა.
მისი თქმით, მმართველი გუნდი აპირებს საარჩენო ბარიერის დაწევას და ამით გარკვეული პარტიების მოთაფვლას. მისივე თქმით, ადგილი აქვს ქართველი ხალხის მოტყუებას.
"უმრავლესობა ჰპირდებოდა საზოგადოებას, რომ შეცვლიდა საარჩევნო სისტემას და გადავიდოდით პროპორციულ საარჩევნო სიატემაზე. ჩვენ სწორედ ამიტომ მივიღეთ მონაწილეობა ამ პროცესში. დღეს გაირკვა, რომ ძალაში რჩება შერეული საარჩევნო სისტემა. აპირებენ საარჩენო ბარიერის დაწევას და ამით გარკვეული პარტიების მოთაფვლას. ადგილი აქვს ქართველი ხალხის მოტყუებას. ეს არის გზა ხელისუფლების უზურპაციისკენ, ეს არის გზა მიხეილ სააკაშვილიზაციისკენ. თუ რვა წლის შემდეგ უნდა ამოქმედდეს ეს სისტემა, დღეს რატომ განვიხილავდით მის შემოღებას?! ჩვენ არ მივიღებთ მონაწილეობას რიგგარეშე სხდომებში და ამ პროექტის დაჩქარებულ რეჟიმში განხილვაში. ქართველ ხალხს არსად ეჩქარება", - განაცხადა ირმა ინაშვილმა.
ცნობისთვის, პარლამენტი რიგგარეშე სხდომას ხვალ, 13:00 საათზე გამართავს. რიგგარეშე სხდომაზე საქართველოს კონსტიტუციაში ცვლილებების შეტანის თაობაზე, აჭარის ავტონომიური რესპუბლიკის კონსტიტუციური კანონპროექტის შესახებ პირველი და მეორე მოსმენის საკითხი და საქართველოს იუსტიციის უმაღლესი საბჭოს წევრების არჩევის საკითხები განიხილება.
