ცვლილებების პროექტი, რომლის მიხედვითაც საკრებულოების შემადგენლობა იცვლება, პარლამენტშია ინიცირებული.
პროექტის მიხედვით, თვითმმართველი თემის შემადგენლობაში შემავალ ქალაქებში, სადაც ამომრჩეველთა რაოდენობა 4 000-ზე მეტია, მაგრამ 10 000-ს არ აღემატება, მაჟორიტარული წესით საკრებულოს 2 წევრი აირჩევა.
ქალაქებში, სადაც ამომრჩეველთა რაოდენობა 10 000-ზე მეტია, მაგრამ 20 000-ს არ აღემატება, მაჟორიტარული წესით საკრებულოს 3 წევრი აირჩევა.
თვითმმართველი თემის შემადგენლობაში შემავალ ქალაქებში, სადაც ამომრჩეველთა რაოდენობა 20 000-ზე მეტია, მაგრამ 35 000-ს არ აღემატება, მაჟორიტარული წესით საკრებულოს 4 წევრი აირჩევა, ხოლო სადაც 35 000 ან მეტია - მაჟორიტარული წესით საკრებულოს 5 წევრი აირჩევა.
ცვლილებათა პროექტი პარლამენტის რეგიონული პოლიტიკისა და თვითმმართველობის კომიტეტის თავმჯდომარემ გრიგოლ ლილუაშვილმა და მისმა მოადგილემ მერაბ ქვარაიამ მოამზადეს.
თვითმმართველობის რეფორმა პარლამენტმა პირველი მოსმენით 15 ივნისს მიიღო.
ცვლილების მიხედვით, 7 ქალაქი: თელავი, გორი, მცხეთა, ამბროლაური, ოზურგეთი, ახალციხე, ზუგდიდი, თვითმმართველი ქალაქის სტატუსს კარგავს, შედეგად კი 14 მუნიციპალიტეტი 7 ერთეულად ერთიანდება. კომიტეტმა ასევე მხარი დაუჭირა თვითმმართველობის კოდექსში ტერმინ გამგებელი/მერის და გამგეობა/მერიის "მერი" და "მერია"-თი ჩანაცვლებას.
