არანაირი გადახვევა იმისგან, რაც უკვე შევათანხმეთ ვენეციის კომისიასთან, არ გვექნება, - ამის შესახებ საპარლამენტო უმრავლესობის წევრმა, ზვიად კვაჭანტირაძემ, „ქართული ოცნების“ ცენტრალურ ოფისში, გიორგი კვირიკაშვილთან შეხვედრამდე, ჟურნალისტებს განუცხადა.
მისი ინფორმაციით, შეხვედრის თემა პარლამენტის რიგგარეშე სხდომას, საკონსტიტუციო კანონსა და იუსტიციის საბჭოს წევრების არჩევას უკავშირდება.
"როგორც იცით უმთავრესი საკონსტიტუციო კანონია. დღეს ალბათ შევათანხმებთ, შევჯერდებით საბოლოოდ იმ ფორმულირებებზე, რა სახითაც ეს კანონპროექტი გამოვა ოთხშაბათს განხილვაზე. ვფიქრობ, არანაირი გადახვევა იმისგან, რაც უკვე შევათანხმეთ ვენეციის კომისიასთან, არ გვექნება და ამ თვალსაზრისით ჩვენი საზოგადოება, ამომრჩეველი სიურპრიზებს არ უნდა ელოდოს”, - განაცხადა ზვიად კვაჭანტირაძემ.
ცნობისთვის, „ქართული ოცნების“ ცენტრალურ ოფისში საპარლამენტო უმრავლესობის შეხვედრა მიმდინარეობს.
