საქართველოს პარლამენტის თავმჯდომარე ირაკლი კობახიძე მზად არის, საზოგადოებრივი მაუწყებლის ეთერში საკონსტიტუციო ცვლილებათა პროექტზე პრეზიდენტთან მსჯელობა გამართოს.
გიორგი მარგველაშვილის გადაწყვეტილება კი 15:00 საათზე გახდება ცნობილი.
საზოგადოებრივმა მაუწყებელმა პრეზიდენტსა და პარლამენტის თავმჯდომარეს საკონსტიტუციო ცვლილებებზე სასაუბროდ პირდაპირი ეთერი გუშინ, მას შემდეგ შესთავაზა, რაც ირაკლი კობახიძე მსჯელობის გამართვის ინიციატივით გამოვიდა.
„გვსურს, გამოვეხმაუროთ საქართველოს პარლამენტის თავმჯდომარის, ირაკლი კობახიძის ინიციატივას, რომლითაც მან მიმართა საქართველოს პრეზიდენტ გიორგი მარგველაშვილს საკონსტიტუციო ცვლილებათა პროექტზე მსჯელობის გამართვასთან დაკავშირებით, ჟურნალისტების თანდასწრებით.
გამოვთქვამთ მზადყოფნას, ამ ფორმატს დავუთმოთ ეთერი და გავწიოთ შესაბამისი საორგანიზაციო, მოსამზადებელი საქმიანობა.
მივიჩნევთ, რომ, უპირველეს ყოვლისა, სწორედ საზოგადოებრივი მაუწყებელი უნდა იყოს საზოგადოებისთვის ასეთი მნიშვნელოვანი ღონისძიებების პლატფორმა“,- აღნიშნულია საზოგადოებრივი მაუწყებლის განცხადებაში.
