ჩვენ ხელი არ უნდა გავიშვიროთ აზერბაიჯანისკენ, მას აქვს თავისი ინტერესები, მე უნდა დავგმო ისეთი პროვოკაციული საქციელი, როდესაც ვიღაცამ ალიევის მემორიალს შეასხა საღებავი, ხელი ჩვენი მთავრობისკენ უნდა გავიშვიროთ, - ამის შესახებ "ევროპული საქართველოს" ერთ-ერთმა ლიდერმა, გიგი უგულავამ ტელეკომპანია "პირველის" გადაცემა "რეაქციის" ეთერში განაცხადა.
უგულავამ საქართველო-აზერბაიჯანის ურთიერთობებზე ისაუბრა და აღნიშნა, რომ ივანიშვილის ხელისუფლებამ აზერბაიჯანთან ურთიერთობა ხელისუფლებაში მოსვლისთანავე გააფუჭა.
მისივე განცხადებით, როდესაც "ქართულმა ოცნებამ" დაინახა, რომ აზერბაიჯანთან სტრატეგიული თანამშრომლობა მარტო ლიტონი სიტყვები არ არის, დაიწყო "შეძრომა".
"აზერბაიჯანთან სტრატეგიული ურთიერთობა არ დაწყებულა ხელისუფლებაში ჩვენი ყოფნის პერიოდში. ეს ჯერ კიდევ შევარდნაძის ხელისუფლებაში ყოფნის პერიოდში დაიწყო. მოხდა ურთიერთობათა კულტივირება. შემდეგ სააკაშვილის ხელისუფლების პერიოდში კიდევ უფრო გაძლიერება და ინსტიტუციონალიზაცია მოხდა. ბიძინა ივანიშვილმა პირველი რაც გაკეთა ეს ურთიერთობა გააფუჭა და ვინც ამ მიმართულებაზე მუშაობს ეს ყველამ კარგად იცის. მხოლოდ ერთი თუ ორი წლის შემდეგ გამოფხიზლდა მთავრობა და დაინახა, რომ აზერბაიჯანთან სტრატეგიული თანამშრომლობა მარტო ლიტონი სიტყვები არ არის, ეს არის კონკრეტული შინაარსის ფრაზა. ამის შემდეგ ჩვენმა მთავრობამ დაიწყო "შეძრომა". ამ ჟარგონს ვიხმარ, რათა გასაგები იყო. ეს არადიპლომატიური ფრაზაა, მაგრამ ზუსტად გამოხატავს პოზიციას", - დასძინა გიგი უგულავამ.
