პრეზიდენტის საპარლამენტო მდივანი ანა დოლიძე დღეს ვენეციას ეწვია. ანა დოლიძე 16-18 ივნისს კომისიის 111- ე სესიის მუშაობაში მიიღებს მონაწილეობას და საქართველოს კონსტიტუციურ კანონპროექტთან დაკავშირებით კომისიის დასკვნის განხილვისას საქართველოს პრეზიდენტის პოზიციას სხდომის მონაწილეებს სიტყვით გამოსვლისას გააცნობს. სესიაზე დასკვნის შესახებ დისკუსიის რეჟიმში იმსჯელებენ.
"როგორც პრეზიდენტის საპარლამენტო მდივანი მივემგზავრები ვენეციაში, ვენეციის კომისიის პლენარულ სხდომაზე დასასწრებად და პრეზიდენტის პოზიციის წარსადგენად.
შევხვდები ვენეციის კომისიის წევრებს და გავაცნობ ჩვენს პოზიციას, იმის შესახებ არის თუ არა ცვლილებებში გამოხატული ჩვენი ქვეყნის დემოკრატიული განვითარების ფასეულობები, გაწონასწორების მექანიზმები, ჩვენი ქვეყნის უსაფრთხოების საკითხები და ყველა ის თემა, რაზეც პრეზიდენტი და ჩვენ ვამახვილებდით ყურადღებას, მათ შორის, პრეზიდენტის პირდაპირი წესით არჩევის შესახებ",- აღნიშნა ანა დოლიძემ.
