საქართველოს პარლამენტში კომიტეტების თავმჯდომარეებისა და გერმანია - სამხრეთ კავკასიის საპარლამენტო ჯგუფის დელეგაციის შეხვედრა გაიმართა, სადაც ორმხრივი ურთიერთობის გაძლიერებაზე და საპარლამენტო თანამშრომლობის გაღრმავებაზე ისაუბრეს. როგორც აღინიშნა, მნიშვნელოვანია არა მხოლოდ ორი ქვეყნის პარლამენტის მეგობრობის ჯგუფების ფარგლებში თანამშრომლობა, არამედ კომიტეტებს შორის ურთიერთობების ჩამოყალიბება. ხაზი გაესვა სექტორული მიმართულებით თანამშრომლობის საჭიროებას.
შეხვედრაზე, მხარეებმა საქართველოს საგარეო პოლიტიკურ პრიორიტეტებზე ისაუბრეს.
„გერმანიის დელეგაციამ, რომელსაც კარინ შტრენცი ხელმძღვანელობს საქართველოს ტერიტორიული მთლიანობისა და სუვერენიტეტის მიმართ მხარდაჭერა კიდევ ერთხელ გამოხატა. ისინი აქტიურად გვიჭერენ მხარს საქართველოს ევროპული და ევროატლანტიკური სტრუქტურების გაწევრიანების გზაზეც", - აღნიშნა საგარეო ურთიერთობათა კომიტეტის თავმჯდომარემ, სოფიო ქაცარავამ. მისივე თქმით, შეხვედრაზე გერმანია-საფრანგეთი-საქართველოს სამმხრივი საპარლამენტო ფორმატის შექმნაზე ისაუბრეს, რაზეც გერმანიამ მზაობა გამოთქვა.
„გერმანია ჩვენთვის მნიშვნელოვანი პარტნიორია, მით უფრო მაშინ, როდესაც საქმე საქართველოს ევროპულ გზას და ინტეგრაციას ეხება. გერმანია ასევე, მნიშვნელოვანი სახელმწიფოა ევროკავშირის საგარეო პოლიტიკის განსაზღვრის კუთხით. ამდენად, ჩვენთვის მასთან თანამშრომლობა, გამოცდილების გაზიარება მნიშვნელოვანია არა მხოლოდ იმისთვის რომ დავნერგოთ შესაბამისი პრაქტიკა საქართველოში, არამედ იმისთვის, რომ პოლიტიკურ დონეზე გერმანიის მხარდაჭერა მოვიპოვოთ", - განაცხადა ევროპასთან ინტეგრაციის კომიტეტის თავმჯდომარემ, თამარ ხულორდავამ. მისივე თქმით, 2017-2018 წლები ქართულ-გერმანულ წლად არის გამოცხადებული და ეს პერიოდი, მაქსიმალურად უნდა იქნას ათვისებული დატვირთული და დინამიური ურთიერთობებით.
შეხვედრაზე მხარეებმა, ორ ქვეყანას შორის განათლებისა და მეცნიერების მიმართულებით არსებულ თანამშრომლობაზე ისაუბრეს.
„მიმოვიხილეთ ის თანამშრომლობა, რომელიც უკვე არსებობს განათლებისა და მეცნიერების სექტორში გერმანიის მთავრობის და განვითარებადი სააგენტოების მხარდაჭერით. საუბარია გაცვლით პროგრამებზე, რომლებიც სხვადასხვა მიმართულებებით ხორციელდება. ასევე, სამეცნიერო თანამშრომლობაზე და პროფესიული განათლების ხარისხის გაუმჯობესების კუთხით დაგეგმილ ურთიერთობებზე. ჩვენ ვთხოვეთ კოლეგებს, რომ შემდგომი ორმხრივი ურთიერთობის ფარგლებში, განსაკუთრებული ყურადღება მეცნიერებისა და განათლების თანამშრომლობის გაფართოებაზე გამახვილდეს", - განაცხადა განათლების, მეცნიერებისა და კულტურის კომიტეტის თავმჯდომარემ მარიამ ჯაშმა.
ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, სოფო კილაძის თქმით, გერმანია ჩვენი ერთ-ერთი უმნიშვნელოვანესი პარტნიორია, განსაკუთრებით იმ სფეროში, რასაც დემოკრატია და სამართლებრივი სახელმწიფოს აშენება-განვითარება ჰქვია. „ეს პირდაპირ კავშირშია ადამიანის უფლებებთან. ამ კუთხით ჩვენ გვაქვს ძალიან მჭიდრო თანამშრომლობა და დღეს, სწორედ ამ მიმართულებით თანამშრომლობის კიდევ უფრო ინტენსივირებაზე ვისაუბრეთ. დაგეგმილია კომიტეტებს შორის ურთიერთობების გაღრმავება და ვფიქრობ, ადამიანის უფლებების განვითარების კუთხით გერმანული მხარის მხარდაჭერა ძალიან მნიშვნელოვანი იქნება", - განაცხადა სოფიო კილაძემ.
შეხვედრაზე მხარეებმა, საქართველოში მიმდინარე რეფორმებზეც ისაუბრეს.
„ვისაუბრეთ იმ რეფორმებზე რომელიც საქართველოში ტარდება. ჩვენ დავინახეთ, რომ საქართველო მყარად დგას დასავლურ გზაზე. გერმანია, თავისი შესაძლებლობის ფარგლებში, ყველა მხრივ დაეხმარება საქართველოს, რათა ეს გზა წარმატებულად გაიაროს. შევთანხმდით, რომ თანამშრომლობა არა მარტო მეგობრობის ჯგუფის ფარგლებში არამედ, პარლამენტის კომიტეტების დონეზეც გვექნება. დარწმუნებული ვარ, საქართველოსა და გერმანიის შორის ურთიერთობები წარმატებით წარიმართება", - განაცხადა შეხვედრის დასრულების შემდეგ, დელეგაციის ხელმძღვანელმა, კარინ შტრენციმ.
