საქართველოს შინაგან საქმეთა მინისტრი კრიმინალური პოლიციის კურატორობას შეითავსებს. ამის შესახებ გიორგი მღებრიშვილმა დედაქალაქისა და რეგიონების საპატრულო პოლიციის დეპარტამენტებთან თათბირზე თავად განაცხადა.
მისი თქმით, აღარ იარსებებს ე.წ. "შუა რგოლი"და დეპარტამენტების უფროსები ანგარიშვალდებულები უშუალოდ მასთან იქნებიან. მინისტრის ფუნქციაში რჩება საპატრულო პოლიციის კურატორობაც.
"ვფიქრობ, თქვენთან ურთიერთობაში შუა რგოლი არ მჭირდება, უფრო აქტიურად უნდა ვიყო ჩართული იმ პროცესებში, რაც მიმდინარეობს საპატრულო პოლიციაში, კრიმინალურ პოლიციაში. ის კოორდინაცია, რომელიც დღემდე არსებობდა, უფრო ეფექტური რომ იყოს, ვფიქრობ, მინისტრის ხელში უნდა გადავიდეს. კოორდინაცია უნდა იყოს ძალინ მჭიდრო. ვფიქრობ, ეს ჩვენს ოპერატიულობასაც ძალიან გაზრდის", - განაცხადა შეხვედრაზე გიორგი მღებრიშვილმა.
ამასთან, შს მინისტრის პირველი მოადგილე ბესიკ ამირანაშვილი, რომელიც კრიმინალური პოლიციის კურატორის პოზიციას იკავებდა, კადრების განკარგულებაში გადადის.
