დედოფლისწყაროს რაიონში ხორბლის ყანებს უკუდო თაგვი შეესია, რომელიც შემოსულ მოსავალს ანადგურებს. ამის შესახებ კახეთის საინფორმაციო ცენტრს ფერმერმა ელიზბარ იმერლიშვილმა აცნობა. მისი თქმით, მღრღნელი ერთ დღეში ანადგურებს მოსავლის იმ ნაწილს, რასაც ჩვეულებრივი თაგვი მთელი წლის მანძილზე.
ამ ინფორმაციას ადასტურებენ ის კომბაინერებიც, რომლებიც ალაზნის პირას მდებარე ყანებს მკიან.
ვეტერინარიის, მცენარეთა დაცვისა და სურსათის უვნებლობის სამსახურის დედოფლისწყაროს რაიონული სამმართველოს უფროსის მერაბ ალადაშვილის განცხადებით, ჯერ-ჯერობით უცნობია რა სახეობის თაგვი გავრცელდა.
„მართალია თაგვი მოსავალს სწრაფად ანადგურებს, მაგრამ ამ ეტაპზე პრევენციული ღონისძიებების გატარება შეუძლებელია, რადგან ალოობა უკვე დაწყებულია. თაგვის საწინააღმდეგო ღონისძიებები შემოდგომაზე გატარდება", - განუცხადა ალადაშვილმა კახეთის საინფორმაციო ცენტრს.
ფერმერები სოფლის მეურნეობის სამინისტროსგან დროულ დახმარებას ითხოვენ.
