ჩვენ, „თავისუფალი დემოკრატები“ და „რესპუბლიკელები“ საგანგაშოდ მივიჩნევთ საქართველოს კონსტიტუციის ცვლილელების პროექტის დაჩქარებულ რეჟიმში განხილვას, - ამის შესახებ „თავისუფალი დემოკრატების“ ერთ-ერთმა ლიდერმა, ნინო გოგუაძემ განაცხადა.
როგორც პარტიების ერთობლივლივ განცხადებაშია აღნიშნული, მმართველი გუნდი სულ მცირე ვენეციის კომისიის დასკვნას უნდა დაელოდოს და შემდეგ დაიწყოს საპარლამენტო განხილვები.
”ჩვენ, „თავისუფალი დემოკრატები“ და „რესპუბლიკელები“ საგანგაშოდ მივიჩნევთ საქართველოს კონსტიტუციის ცვლილელების პროექტის დაჩქარებულ რეჟიმში განხილვას. „ქართულმა ოცნებამ“ უკვე დაიწყო საკომიტეტო მოსმენები, იმ ფონზე, როდესაც ირაკლი კობახიძე საჯაროდ აცხადებდა, რომ ცვლილებების მიღებისას აუცილებლად გაითვალისწინებდნენ ვენეციის კომისიის მოსაზრებებსა და შენიშვნებს. მოგეხსენებათ, ვენეციის კომისიის დასკვნა 17 ივნისს გამოქვეყნდება მაშინ, როდესაც კომიტეტებში კონსტიტუციის განხილვა უკვე დაწყებულია“, - განაცხადა ნინო გოგუაძემ.
”რესპუბლიკური პარტიის” ერთ-ერთი ლიდერის თამარ კორძაიას განმარტებით, წარმოდგენილი ცვლილებების შემოთავაზებული სახით მიღება, ჩიხში შეიყვანს ჩვენს ქვეყანას, რადგან დააშორებს რეალური საპარლამენტო მმართველობის მოდელს, ვერ უზრუნველყოფს მრავალპარტიულ წარმომადგენლობას პარლამენტში, აკრძალავს საქართველოს პრეზიდენტის პირდაპირი წესით არჩევას, შეასუსტებს ადგილობრივ თვითმმართველობას და დაბლა დასწევს ადამიანის უფლებების დღეს არსებულ სტანდარტს.
კორძაია აქვე აღნიშნავს, რომ მმართველი პოლიტიკური ძალა, კიდევ ერთხელ, თვალნათლივ ადასტურებს, რომ მისთვის არავითარი მნიშვნელობა არ აქვს არც ოპოზიციური პოლიტიკური პარტიების, არც პრეზიდენტის, არც სამოქალაქო სექტორის და არც ავტორიტეტული საერთაშორისო ორგანიზაციების მოსაზრებებსა და შეფასებებს. მისივე თქმით, მმართველი პოლიტიკური ძალა ურყევად დაადგა ხელისუფლების მიტაცების გზას და სურს, უმოკლეს ვადაში გაიმყაროს და დაიმტკიცოს ძალაუფლება.
პარტიები დაუშვებელად მიიჩნევენ ქვეყნის მმართველობის მოდელის შეცვლას ასეთ დაჩქარებულ ტემპებში.
