პოლიტოლოგი რამაზ საყვარელიძე საქართველოს მთავრობაში განხორციელებულ ცვლილებებს მიესალმება. მისი თქმით, მთავრობაში განხორციელებულ ცვლილებებს შეიძლება როტაციაც დავარქვათ, რაც სხვადასხვა უწყებაში სიახლისა და ენერგიის საჭიროებამ გამოიწვია. ამის შესახებ პოლიტოლოგმა "ჯი-ეიჩ-ენს" განუცხადა.
"ვერ ვიტყვით, რომ შემოყვანილი იქნა პოლიტიკური ფიგურები, რომლებსაც მკვეთრად გამოკვეთილი პოლიტიკური პულსი ახლავთ თან, ასეთი პულსის ამოკითხვა ცვლილებების შედეგად მოსულ ადამიანებში ძნელია. ამიტომ ბევრგან არის ალბათ სიახლის მოთხოვნა, ბევრგან - მეტი ენერგიის. მაგალითად, სამინისტროს რომ გამოეყო სპორტის დეპარტამენტი, იქ ენერგიული ახალგაზრდა დაინიშნა. საერთოდ, ნებისმიერ შემთხვევაში, ცვლილება საჭიროა და აუცილებელი არ არის, ამ ცვლილებების უკან რაღაც ჩანაფიქრი ვეძებოთ. თუკი რაიმე არ შავდება, უკეთესია შეიცვალოს და ისე გაგრძელდეს პროცესი, ვიდრე არ შეიცვალოს და ისე. ცვლილებები საჭიროა, შეგვიძლია ამას დავარქვათ როტაცია", - განუცხადა "ჯი-ეიჩ-ენს" საყვარელიძემ.
შეგახსენებთ, რომ დღეს მთავრობაში სტრუქტურული ცვლილებები განხორციელდა: ეკონომიკური განვითარების სამინისტრო გარდაიქმნება ეკონომიკისა და მდგრადი განვითარების სამინისტროდ და მას ვერა ქობალია უხელმძღვანელებს. რეგიონული მართვისა და ინფრასტრუქტურის საკითხებში სახელმწიფო მინისტრი დავით ტყეშელაშვილი გზების დეპარტამენტის თავმჯდომარე რამაზ ნიკოლაიშვილმა შეცვალა. თავად ტყეშელაშვილი პრეზიდენტის ადმინისტრაციის უფროსად დანიშნა, მისი მოადგილე ჟურნალისტი ირმა ნადირაშვილი იქნება. კულტურის სამინისტროს გამოეყო ახალგაზრდობისა და სპორტის დეპარტამენტი, რომელიც ცალკე სამინისტროდ ჩამოყალიბდება და მას შიდა ქართლის რეგიონში პრეზიდენტის ყოფილი რწმუნებული ლადო ვარძელაშვილი უხელმძღვანელებს. საგარეო საქმეთა მინისტრის მოადგილედ თორნიკე გორდაძე დაინიშნა.
