ნატო-ს საპარლამენტო ასამბლეის პრეზიდენტი პაოლო ალი აცხადებს, რომ რუსეთის მცოცავი ანექსია აბსოლუტურად მიუღებელია, - ამის შესახებ პაოლო ალიმ ნატოს საპარლამენტო ასამბლეის საგაზაფხულო სესიაზე სიტყვით გამოსვლისას განაცხადა.
„ასამბლეა მუდმივად გმობს რუსეთის მიუღებელ ოკუპაციას „სამხრეთ ოსეთსა“ და აფხაზეთში. რუსეთი ცდილობს, საქართველოს მეტი და მეტი მიწები მიიტაცოს და გააძლიეროს თავისი ზეგავლენა აქ. რამდენიმე დღის წინ, სასაზღვრო ზოლი და რუსეთის მცოცავი ანექსია ვნახეთ. ეს აბსოლუტურად მიუღებელია. ამაზე დეკლარაცია გვექნება და მოგვიანებით ვიმსჯელებთ. ეს იქნება ძალიან მტკიცე განცხადება ჩვენი მხარდაჭერისა. ეს იქნება ჩვენი გამოხატულება, რომ საქართველო ნამდვილად ნატოს წევრი უნდა გახდეს. იმედი მაქვს, რომ ეს მიღებული იქნება უმრავლესობის მიერ და კიდევ ერთხელ დაამტკიცებს, რომ საქართველოსთან დაკავშირებით აბსოლუტურად კონსოლიდირებული აზრი გვაქვს“, - განაცხადა ალიმ.
