მე არ გამიკეთებია განცხადება, რომ არჩევნებში კენჭს ვიყრი და შესაბამისად, ჩემს არგაკეთებულ განცხადებაზე გაკეთებული კომენტარები მომწონს, - ასე გამოეხმაურა საქართველოს პრეზიდენტი გიორგი მარგველაშვილი უმრავლესობის წევრი დეპუტატის, ეკა ბესელიას განცხადებას, რომელმაც განაცხადა, რომ პრეზიდენტი ვითარებას წარმოაჩენს ისე, თითქოს საპრეზიდენტო არჩევნებში გარანტირებული ჰქონდეს გამარჯვება.
გიორგი მარგველაშვილის თქმით, პოლიტიკოსისთვის მნიშვნელოვანია, როდესაც მის განცხადებას მოჰყვება ფართო რეზონანსი და ყურადღებას აქცევენ მის განცხადებას.
”კიდევ უფრო მნიშვნელოვანია, როცა განცხადებას არ გააკეთებ და ამასაც უკვე გარკვეული კომენტარები მოჰყვება. მე არჩევნებში მონაწილეობაზე საერთოდ არ გამიკეთებია განცხადება და პოლიტიკოსი განცხადებას რომ არ აკეთებ და მაინც კეთდება კომენტარები, ეს უკვე რაღაც საინტერესო ვითარებაა. მე არ გამიკეთებია განცხადება, რომ არჩევნებში კენჭს ვიყრი და შესაბამისად, ჩემს არგაკეთებულ განცხადებაზე გაკეთებული კომენტარები მომწონს”,- განაცხადა პრეზიდენტმა.
