„მოძრაობა თავისუფლებისთვის - ევროპული საქართველოს“ წევრმა სერგი კაპანაძემ გადაცემა „პოლიტმეტრში“ „IRI“-ს მიერ ცოტა ხნის წინ გავრცელებულ რეიტინგებზე ისაუბრა. მან პოზიტიურად შეაფასა ახალი პოლიტიკური პარტიის მიერ კვლევაში მიღებული მონაცემები და სამომავლო ზრდა ივარაუდა. მისი თქმით, პოლიტიკურ პარტიას საკმაოდ ამბიციური მიზნები აქვს და ამის მისაღწევად აქვთ მათ საკმარისი რესურსები.
„რაც შეეხება პოლიტიკური პარტიების რეიტინგებს, ამ კვლევის საველე სამუშაოები ჩატარდა თებერვალში, ანუ მაშინ როდესაც ახალი დაშლილები ვიყავით. აქედან გამომდინარე, ძალიან ადრე იყო ჩვენთვის. მიუხედავად ამისა ის 8%, რომელიც ჩვენ მივიღეთ, ძალიან კარგი სასტარტო პროცენტია და ჩვენ ამაზე გაჩერებას არ ვაპირებთ. ეს ალბათ ასახავს იმ წუთში რა განწყობებიც იყო ჩვენთან მიმართებაში. ამ ციფრს ვუყურებთ ერთობლიობაში მეორე ციფრთან ერთად, ჩვენი ლიდერი, დათო ბაქრაძე არის ყველაზე უფრო რეიტინგული ოპოზიციონერი პოლიტიკოსი. ეს გვაძლევს საშუალებას რომ კიდევ გავიზარდოთ და ჩვენი ამოცანა ამ ამბავში არაა რომელიმე პოლიტიკური ძალის, თუნდაც ნაციონალური მოძრაობის გადასწრება. ჩვენი ამოცანა არის საბოლოოდ არჩევნებში გამარჯვება.“- განაცხადა სერგი კაპანაძემ.
