„თქვენ აპირებთ „ქართული ოცნების კონსტიტუცია მიიღოთ და არა ქვეყნის კონსტიტუცია“ - გადაცემა „პოლიტმეტრის“ ეთერში „ნაციონალური მოძრაობის“ წევრ ლევან ბეჟაშვილსა და პარლამენტის იურიდიულ საკითხთა კომიტეტის თავმჯდომარის მოადგილე, დავით მათიკაშვილს შორის დისკურსია გაიმართა. მხარეები საკონსტიტუციო ცვლილებებში განსახორციელებელ საკითხებზე კამათობდნენ.
„საუბარი არის პრეზიდენტის არაპირდაპირი გზით არჩევაზე, მაშინ როდესაც არ ვიცით რომელი კოლეგიალური ორგანო აარჩევს. თუ პარლამენტი ირჩევს, მაშინ ეს საკითხი გადაჯაჭვულია საარჩევნო საპარლამენტო სისტემასთან. გეკითხებით, როგორ აპირებთ საარჩევნო სისტემის შეცვლას. დღეს გაცხადდა, რომ პროპორციული საარჩევნო სისტემა იქნებაო, მაგრამ იქვე დათქმა იყო, რომ არ ვიცით ჯერ ეს საერთო ეროვნული პროპორციული სიები იქნება თუ რეგიონალური პროპორციული სიებიც დაემატებაო. ამაზეც პოზიცია არ გაქვთ ჩამოყალიბებული. შემდგომ გაჟღერდა, რომ 300 კაციანი კოლეგია აირჩევსო, რატომ 300 და არა 350, რა პრინციპით მოხდება ამ კოლეგიის ჩამოყალიბება. უამრავი საკითხია, რომელიც ჯერ არ გაჟღერებულა და უკვე გამოცხადდა, როგორც საკონსტიტუციო კომისიის საქმიანობის მეორე ეტაპი.“ - განაცხადა ლევან ბეჟაშვილმა.
საკონსტიტუციო კომისია მუშაობს ინიციატივაზე, რომლის მიხედვითაც საქართველოს პრეზიდენტის არჩევა პარლამენტის პრივილეგია შეიძლება გახდეს. აღნიშნულ საკითხს ეწინააღმდეგებიან როგორც ოპოზიციაში, ისე არასამთავრობო სექტორში.
