საქართველოსა და შვეიცარიის კონფედერაცია დიპლომატიური ურთიერთობების დამყარების 25 წლისთავს აღნიშნავს. ამასთან დაკავშირებით ორი ქვეყნის საგარეო საქმეთა მინისტრებმა მისალოცი წერილები გაცვალეს, სადაც ხაზგასმულია წარმატებული ორმხრივი ურთიერთობები და ორი ქვეყნის მჭიდრო პარტნიორობა.

„ბოლო წლების განმალობაში საქართველო - შვეიცარიის ურთიერთობები განსაკუთრებით გაღრმავდა და ურთიერთობის 25 წლისთავზე  თანამშრომლობის კუთხით ბევრი შთამბეჭდავი და მნიშვნელოვანი წარმატება შეგვიძლია ავღნიშნოთ“ -  ნათქვამია მიხეილ ჯანელიძის წერილში, რომელიც დიპლომატიური ურთიერთობების დამყარების საიუბილეო თარიღს ეძღვნება.

საგარეო საქმეთა მინისტრები ყურადღებას ამახვილებენ ქვეყნებს შორის ეკონომიკური და ხალხთაშორისი ურთიერთობის გააქტიურებაზე  და ხაზს უსვამენ  ამ კუთხით არსებულ დიდ პოტენციალს. როგორც საქართველოს საგარეო უწყების ხელმძღვანელი აღნიშნავს,  ორივე ქვეყნისთვის მნიშვნელოვანია სხვადასხვა სფეროში  ორმხრივი თანამშრომლობის განვითარება და ხალხთაშორისი კავშირების გაღრმავება.

შვეიცარიის საგარეო საქმეთა მინისტრი საკუთარ წერილში ასევე ხაზს უსვამს, საქართველოსა  და ევროპის თავისუფალი ვაჭრობის ასოციაციას (EFTA) შორის შეთანხმების ხელმოწერას  და მას  „საქართველოს და ასოციაციის წევრებს შორის მჭიდრო ეკონომიკური ურთიერთობების განვითარებისაკენ  გადადგმულ მნიშვნელოვან ნაბიჯს“, უწოდებს. როგორც დიდიერ ბურქჰალტერი აღნიშნავს  „შვეიცარიის სამხრეთ კავკასიასთან თანამშრომლობის ახალი სტრატეგია, რომლის იმპლემენტაციაც 2017-2020 წლებში მოხდება, ხელს შეუწყობს ორ ქვეყანასა და ხალხს შორის კავშირების გაძლიერებას“.