პრემიერ-მინისტრ გიორგი კვირიკაშვილის განცხადებით, განათლების, მეცნიერებისა და კულტურის სფეროში საქართველოსა და საბერძნეთს შორის ურთიერთობა ნაყოფიერია. პრემიერის თქმით, ბერძენ კოლეგასთან გამართულ შეხვედრაზე მაღალი დონის პოლიტიკური დიალოგის შენარჩუნების უცილებელობასა და ურთიერთობების გაღრმავების პერსპექტივებს გაესვა ხაზი.
“ყურადღება გავამახვილეთ სექტორული თანამშრომლობის გააქტიურებაზე და განსაკუთრებით, ეკონომიკური ურთიერთობების გაღრმავებაზე. ამ მხრივ, ქვეყნებს შორის თანამშრომლობის პოტენციალი საკმაოდ დიდია და ვაპირებთ, რომ მაქსიმალური ძალისხმევით ვიმუშაოთ ამ მიმართულებით. კმაყოფილებით მინდა აღვნიშნო, რომ საქართველოსა და საბერძნეთს შორის ძალიან ნაყოფიერია ურთიერთობა განათლების, მეცნიერებისა და კულტურის სფეროში. ჩვენ გვაქვს ძალიან მყარი კულტურული საფუძველი იმისთვის, რომ ჩვენს ქვეყნებს შორის ურთიერთობა იყოს კიდევ უფრო ფართო და ჩვენი პარტიორობა იყოს გაცილებით ღრმა. პირველი ნაბიჯის იქნება მაისის ბოლოს ორმხრივი თანამშრომლობის კომისიის შეხვედრა აქ - საბერძნეთში, სადაც საფუძველს ჩავუყრით სრულიად ახალ, თვისობრივად, ხარისხობრივად, მასშტაბებით განსხვავებულ თანამშრომლობას საქართველოსა და საბერძნეთს შორის”, - განაცხადა საქართველოს მთავრობის მეთაურმა.
საქართველოს მოქალაქეები დღეიდან ევროკავშირის/შენგენის ქვეყნებში უვიზოდ იმოგზაურებენ. ევროკავშირის ქვეყნებში უვიზოდ მიმავალ მგზავრთა პირველ ნაკადს პრემიერ-მინისტრი გიორგი კვირიკაშვილი შეუერთდა.
უვიზო რეჟიმის ამოქმედებასთან დაკავშირებით, საქართველოს მთავრობის მეთაური სიმბოლური ვიზიტით უძველესი ცივილიზაციის დედაქალაქს - ათენს ეწვია, ხოლო შემდეგ, ბრიუსელს ეწვევა.
