საქართველოს გამთენიისას ევროპის საბჭოს საპარლამენტო ასამბლეის მონიტორინგის კომიტეტის წევრები კერსტინ ლუნდგრენი და ბას კლეინი ეწვივნენ. დელეგაციის კიდევ ერთი წევრი, ბორის სილევიჩი საქართველოს დედაქალაქს 27 მარტს ეწვია. ვიზიტის ფარგლებში, დღეს დელეგაციის წევრები, მრგვალი მაგიდის ფორმატში, არასამთავრობო ორგანიზაციებს შეხვდებიან. განხილვის მთავარი თემები საკონსტიტუციო ცვლილებები და სასამართლო რეფორმა იქნება.
დღესვე დელეგაცია ასევე შეხვდება საქართველოს პრეზიდენტ გიორგი მარგველაშვილს, პარლამენტის თავმჯდომარე ირაკლი კობახიძეს და საკონსტიტუციო კომისიის წევრებს. გაიმართება შეხვედრები იუსტიციის მინისტრის მოვალეობის შემსრულებელ ალექსანდრე ბარამიძესთან, მთავარ პროკურორ ირაკლი შოთაძესთან, სახალხო დამცველ უჩა ნანუაშვილთან.
30 მარტს კი ევროსაბჭოს დელეგაცია საქართველოს პრემიერმინისტრს, საგარეო საქმეთა მინისტრს შეხვდება. გაიმართება შეხვედრები საპარლამენტო უმრავლესობის, საპარლამენტო და არასაპარლამენტო ოპოზიციის წარმომადგენლებთან.
ევროპის საბჭოს საპარლამენტო ასამბლეის დელეგაციის ვიზიტი თბილისში 31 მარტს დასრულდება.
