პარლამენტთან აქცია ამ დრომდე მიმდინარეობს, ადგილზე „ბავშვთა სამყაროს“ დაწვის შედეგად დაზარალებული მოვაჭრეები არიან შეკრებილნი. აქციის განმავლობაში საჭირო გახდა რამოდენიმე ადამიანისთვის სამედიცინო დახმარების გაწევა, თუმცა კლინიკაში გადაყვანა არ გახდა საჭირო.
მათი მოთხოვნები უცვლელია - მათ სურთ რომ მთავრობამ კომპენსაცია გადაუხადოს ბავშვთა სამყაროს დაზარალებულ მოვაჭრეებს და ასევე შეჩერდეს მათი საბანკო ვალდებულებებიც.
„მარტო პატრული, რომელიც გვაკონტროლებს და იცავს პარლამენტის შენობას, ესენი არიან ჩვენის გვერდით და სასწრაფოა, რომ თუ ცუდად გავხდით, მოგვხედონ. გაღებული ფანჯრებიდან გამოყოფენ ტელეფონებს, გვიღებენ და იცინიან. ყველაზე ცუდი ეგ არის რომ იცინიან. 15 ლარიანი მედუდუკე ქალები ხართო. ამას რომ დაცვა გიწოდებს, თან მერიის,“ - განაცხადა აქციის ერთ-ერთმა მონაწილემ.
ბავშვთა სამყაროს დაზარალებულების აქციას შეუერთდნენ უფლებადამცველები, ასევე ჟურნალისტი ელისო კილაძე და საკრებულოს ნაციონალური მოძრაობის წევრები.
