პოლიტიკოსებმა სასამართლოების გადაწყვეტილებებზე კომენტარები არ უნდა აკეთონ, - განაცხადა ადამიანის უფლებათა ევროპული სასამართლოს მოსამართლეთა არჩევის კომიტეტის თავმჯდომარემ, ლატვიის პარლამენტის წევრმა, ბორის სილევიჩმა.
,,წლების შემდეგ ექსპერტებმა და აკადემიკოსებმა უნდა იმსჯელონ. სასამართლოების გადაწყვეტილებებს პატივი უნდა ვცეთ. არაერთხელ გაგვიჟღერებია გზავნილი საქართველოს ხელისუფლებისთვის, რომ სიტყვის თავისუფლება და განსხვავებული შეხედულებები უზრუნველყოფილი უნდა იყოს. მიუხედავად იმისა, რას გადაწყვეტს სტრასბურგის სასამართლო, ხელისუფლებას აქვს მნიშვნელოვანი ვალდებულება, უზრუნველყოს სიტყვის თავისუფლება და განსხვავებული ხედვის გამოხატვა. ვიმედოვნებთ, საკუთრების უფლებებზე დავა სიტყვის თავისუფლებაზე უარყოფით გავლენას არ მოახდენს.
საქართველოში სიტუაცია გაცილებით უკეთესია, ვიდრე რეგიონის სხვა ქვეყნებში.
სტრასბურგის სასამართლო არ არის საქართველოს ზედა ან ქვედა ინსტანციის სასამართლო. ის ემსახურება ადამიანის უფლებათა ევროპული კონვენციის უფლებების დაცვას, იღებს გადაწყვეტილებებს და აკისრებს კომპენსაციებს დაზარალებული მხარის სასარგებლოდ, რაც არ არის უმნიშვნელოვანესი. უმნიშვნელოვანესია სტანდარტები და განმარტებები.
რაც შეეხება ქართველ მოსამართლეებს, რომელთა კანდიდატურებიც უარყვეს, გასაუბრების პროცედურები კონფიდენციალურია. რეკომენდაცია იყო სიის უარყოფა, რადგან ყველა კანდიდატი არ აკმაყოფილებდა მოთხოვნებს. ეს არ ნიშნავს, რომ სამივე არ აკმაყოფილებდა. იმედია, უკეთესი შედეგები იქნება", - განაცხადა ბორის სილევიჩმა.
ის ბორჯომში საერთაშორისო კონფერენციაში "საქართველოს პარლამენტის როლი ადამიანის უფლებათა ევროპული კონვენციის სტანდარტების იმპლემენტაცია" მონაწილეობს.
