პრეზიდენტის არჩევაში, შესაძლოა პარლამენტის წევრების გარდა, ადგილობრივი თვითმმართველობების წარმომადგენლებიც ჩაერთონ. “საერთაშორისო გამჭვირვალობა-საქართველოს“ წარმომადგენლის, ეკა გიგაურის ინფორმაციით, დღევანდელ შეხვედრაზე აღნიშნული მოდელი საკონსტიტუციო ცვლილებათა კომისიას ვახტანგ ხმალაძემ შესთავაზა
,,საუბარია იმაზე, რომ პრეზიდენტს არა მხოლოდ პარლამენტი აირჩევს, არამედ მის არჩევაში ადგილობრივი თვითმმართველობების წარმომადგენლები ჩაერთვებიან. საბოლოო შეთანხმება ჯერ არ ყოფილა, თუმცა კომისია იცვლის პოზიციას, რომ იყოს ადგილობრივი თვითმმართველობების უფრო მეტი ჩართულობა. შესაძლებელია ამას მმართველი გუნდი დათანხმდეს. თუკი პრეზიდენტის არჩევა არაპირდაპირი წესით მოხდება, მაშინ მნიშვნელოვანია, რომ ეს წესი მაქსიმალურ ჩართულობას ითვალისწინებდეს“, - განაცხადა ეკა გიგაურმა.
მისივე თქმით, საერთო ჯამში, პრეზიდენტის უფლებამოსილებები დიდად არ იკვეცება.
,,ჯერჯერობით კომისიაში დისკუსიაა. ჩვენი პოზიციაა, რომ უნდა გავითვალისწინოთ ის, რაზეც გასულ წლებში კონსტიტუციაში შესატან ცვლილებებთან დაკავშირებით ვენეციის კომისია საუბრობდა, ასევე მიგვაჩნია, რომ მნიშვნელოვანია, უშიშროების ეროვნული საბჭო უფრო ქმედითი მექანიზმი გახდეს, თუმცა საერთო ჯამში, დიდი ცვლილებები არ არის გათვალისწინებული“, - აღნიშნა გიგაურმა.
