აჭარის პოლიციის სამმართველოში დაკითხვაზე მყოფი არასამთავრობო ორგანიზაცია "კორუფციასთან ბრძოლის" საინფორმაციო ცენტრის ხელმძღვანელი, მერაბ ღოღობერიძე შეუძლოდ გახდა და კლინიკაში გადაიყვანეს. საავადმყოფოდან გამოსვლის შემდეგ ღოღობერიძე ჟურნალისტებს გაესაუბრა. მისი თქმით, დაკითხვისას არაფერი განსაკუთრებული არ მომხდარა და ის უბრალოდ შეუძლოდ გახდა.
"მე ვენდობი გამოძიებას და შესაბამისად, ვფიქრობ, რომ სწორ დასკვნებს დადებს. რაც შეეხება ჩემ დაკითხვას, შეუძლოდ გავხდი და შევწყვიტე პროცესი, თავად გადმოვედი საავადმყოფოში. დასაკითხად მოწმის სტატუსით ვიყავი დაბარებული. რასაც მოვითხოვდი, იმასთან დაკავშირებით მეკითხებოდნენ. კახაბერ ბუხრაძის გადადგომას დღესაც მოვითხოვ, რადგან აჭარაში ძალიან მძიმე მდგომარეობაა და ორივე მხარემ უნდა გაითვალისწინოს. დღეს ვანდალიზმზე საუბრობენ, მაგრამ ბუხრაძემ უფლებამოსილებას გადააჭარბა და მისი გადადგომისთვის მუშაობას დავიწყებთ, ჩემ კოლეგებთან ერთად. ჩემი ბრალეულობის საკითხი არანაირად არ იკვეთება," - განაცხადა მერაბ ღოღობერიძემ.
