საქართველოს ახალგაზრდა იურისტთა ასოციაციის სტრატეგიული სამართალწარმოების პროექტის კოორდინატორი, თამარ აბაზაძე ევროსასამართლოსა და „რუსთავი 2“-ს საქმეზე კომენტარს აკეთებს.
მისი თქმით,არ შეიძლება სტრასბურგის სასამართლო ჩაითვალოს როგორც მეოთხე ინსტანცია. პროცესში ხდება არა საქმის დეტალების შესწავლა, არამედ იმის დადგენა, დაირღვა თუ არა სამართალწარმოებისას რაიმე კონვენიცია. თუკი დარღვევა გამოვლინდა, საქმე კვლავ თავიდან უნდა დაიწყოს ქვეყნის სასამართლო სისტემაში, ამჯერად უკვე დარღვევების გარეშე.
„ზოგადად სუბსიდირების პრინციპი გულისხმობს, რომ ადამიანის უფლებათა ევროპული სასამართლო არის დამხმარე ორგანო. რეალურად, ადამიანის უფლებათა სასამართლო არ არის, ასე ვთქვათ, მეოთხე ინსტანცია, აქ იგულისხმება, რომ ქვეყანაში მოქმედებს 3 ინსტანციის სასამართლო და ამ სასამართლოებს არ ანაცვლებს ევროპული სასამართლო, ანუ ევროპულ სასამართლოს არ შეუძლია, შეცვალოს ეროვნული სასამრთლოს მიერ მიღებული გადაწყვეტილება. ევროპული სასამართლო არ აფასებს, დაირღვა თუ არა ქვეყნის შიდა კანონმდებლობა, ის აფასებს, დაირღვა თუ არა ევროპული კონვენცია და მისი დამატებითი ოქმებით გათვალისწინებული ოქმები,“ - აცხადებს თამარ აბაზაძე.
