„მე ვფიქრობ, რომ აქცია დაიწყო სპონტანურად, ეს ჩემი პირადი აზრია,“ - აცხადებს აჭარის ავტონომიური რესპუბლიკის უმაღლესი საბჭოს ფრაქცია ქართული ოცნების თავმჯდომარე, ირაკლი ჭეიშვილი. მან ამის შესახებ გადაცემა „არჩევანის“ ეთერში ისაუბრა.
მისი თქმით, აქციაზე სწრაფად შეგროვდა ხალხი, მათ დაახლოებით 5 კილომეტრი ფეხით გაიარეს ქალაქის მთავარი სამმართველოსკენ, ხოლო დემონსტრანტებში „ნაციონალური მოძრაობის“ წარმომადგენლებიც იყვნენ.
„მომიტინგეები ითხოვდნენ დაკავებულების გამოშვებას, გათავისუფლებას და პლიუს ამას, ითხოვდნენ კახაბერ ბუხრაძის, აჭარის საპატრულო პოლიციის ხელმძღვანელის თანამდებობიდან გათავისუფლებას,“ - განაცხადა ირაკლი ჭეიშვილმა.
მისი თქმით, „ნაციონალური მოძრაობის“ წევრმა, ელგუჯა ბაგრატიონმა ითავა მმართველ გუნდთან მოლაპარაკება და დაკავებულთა გამოშვების შემთხვევაში, ხალხის დამშვიდებაზე პასუხისმგებლობა აიღო.
„ისე დალაგდა, რომ შევთანხმდით იქვე, რომ ეს ადამინები გამოვიდოდნენ, ოღონდ, ვციტირებ, რაც უთხრა შს მინისტრის მოადგილემ, ამირანაშვილმა, - დაიწყოს ქუჩის გათავისუფლების პროცესიო,“ - განაცხადა ირაკლი ჭეიშვილმა.
თუმცა ამის შემდეგ პროცესი უკონტროლო გახდა და აგრესიულად განწყობილმა დემონსტრანტებმა ქვების სროლა დაიწყეს, ერთერთი მათგანი კი თავად ირაკლი ჭეიშვილს მოხვდა.
