პარლამენტის ფრაქცია ევროპული საქართველოს თავმჯდომარე, ოთარ კახიძემ “კურიერთან“ საუბარში განაცხადა, რომ ბათუმის მოვლენებში მერაბ ღოღობერიძის წვლილს ხედავს.
„ეს არის სუს-ის ცნობილი ზონდერი, რომელიც გამოიყენებოდა ხელისუფლების მიერ საკონსტიტუციო სასამართლოზე თავდასხმისთვის, პოლიტიკურ ოპოზიციაზე თავდასხმისთვის. ის გულშემატკივრობს ე.წ. ღარიბაშვილის კლანს და თავად აცხადებდა, რომ ამ აქციის ერთ-ერთი ორგანიზატორი გახლდათ თვითონ. ვინმე კი არ აბრალებს, თავად ამბობს ამას,“ - აცხადებს ოთარ კახიძე.
მან აღნიშნა, რომ განვითარებული მოვლენები არ გავდა სპონტანურად აგორებულ ტალღას და გამოძიებამ უნდა დაადგინოს ვინ გაამწვავა მოვლენები და ყავს თუ არა მერაბ ღოღობერიძეს თანამძრახველები.
„ეს არ ჰგავდა სპონტანურ აქციას. აქციის მონაწილეებს ჰქონდათ მოლოტოვის კოქტეილები, ჯაჭვები, ჰქონდათ ნიღბები, ტომრებით მიიტანეს ქვები და საკმაოდ ორგანიზებულად დაესხნენ თავს, როგორ პოლიციას, ისე შემდგომ მთელი ღამის განმავლობაში არბიეს ულამაზესი ქალაქი,“ - განაცხადა ოთარ კახიძემ.
კახიძემ ხელისუფლების მხრიდან ნაციონალური მოძრაობის მისამართით გაჟღერებულ ბრალდებებზეც ისაუბრა, მისი თქმით ნაცინალებმა ამ ეჭვების დაბადებას თავად შეუწყეს ხელი.
„ისიც უნდა ვაღიაროთ, რომ ერთიანმა ნაციონალურმა მოძრაობამ ნოყიერი ნიადაგი შექმნა იმისთვის, რომ ხელისუფლებას გაეშვირა ხელი ნაციონალური მოძრაობისკენ. ევროპული მოძრაობა მიიჩნევს, რომ არ შეიძლება, პასუხისმგებლიანი პოლიტიკური ძალა ეძებდეს არეულობაში შანსს და არ შეიძლება, კეთდებოდეს განცხადება იმის თაობაზე, რომ სოლიდარობა ანტისამთავრობო მოძრაობას აჭარაში და დავირაზმოთ ახლა და მოვექცეთ ამ საპროტესტო მოძრაობის სათავეში,“ - განაცხადა ოთარ კახიძემ.
