ჩვენ, პირველ რიგში, ვაწვდით საკონსტიტუციო კომისიას ქართული საზოგადოების მოსაზრებებს იმაზე, თუ რა გვინდა ვიხილოთ კონსტიტუციაში, - ამის შესახებ საქართველოს პრეზიდენტმა კონსტიტუციის განხილვასთან დაკავშირებით საერთო-სახალხო ჩართულობის უზრუნველსაყოფი კამპანიის პრეზენტაციაზე განაცხადა. გიორგი მარგველაშვილის თქმით, დარწმუნებულია, რომ კომისიის წევრები არ ფიქრობენ პარტიული პოზიციიდან.
,,ეს არის დახმარება, იმის თაობაზე, რომ პატივცემული სახელმწიფო საკონსტიტუციო კომისიის წევრები, რომლებიც დარწმუნებული ვარ, როდესაც კონსტიტუციის უაღრესად მნიშვნელოვან თითოეულ მუხლზე მუშაობენ, არ ფიქრობს პარტიული პოზიციიდან, არამედ ფიქრობს, თუ რის წაკითხვას მოინდომებდა ქართველი ხალხი ამა თუ იმ მუხლში, მათ ვეხმარებით იქიდან გამომდინარე, რომ ვაწვდით ქართული საზოგადოების მოსაზრებებს იმაზე, თუ რა გვინდა რომ ჩვენ ვიხილოთ კონსტიტუციაში. ჩვენ ასევე ვეხმარებით კომისიას იმ თვალსაზრისით, რომ მომავალი პროექტის განხილვის პროცესში, ქართული საზოგადოება ბევრად უფრო მობილიზებული, ორგანიზებული და გათვითცნობიერებული იქნება საკონსტიტუციო საკითხებში და ბევრად უფრო კვალიფიციურ დიალოგში შევა მომავალი პროექტის განხილვისას. ასე, რომ ჩვენ დღეს ვიწყებთ თანხმობის პროცესს. პროცესს რომელიც მიგვიყვანს საბოლოოდ იმ მიზნამდე, რომ კონსტიტუციაზე, რომელიც იწყება სიტყვებით - ”ჩვენ საქართველოს მოქალაქენი”, ხელის მომწერი იქნება ქართული საზოგადოება და ქართველი ხალხი”, - განაცხადა პრეზიდენტმა.
