გიორგი მარგველაშვილმა თავისი განცხადებებით შეურაცხყოფა მიაყენა საკონსტიტუციო კომისიას, - ასე აფასებს პრეზიდენტის განცხადებას საპარლამენტო უმრავლესობის წევრი "ქართული ოცნებიდან", ირაკლი სესიაშვილი.
მისივე თქმით, პრეზიდენტის განცხადება პოლიტიკური სპეკულაცია იყო.
"სამწუხაროდ, პრეიზდენტმა, ამ შემთხვევაში, შეურაცხყოფა მიაყენა მთლიანად კომისიას. აქ არ არის საუბარი "ქართულ ოცნებასა" და ხელისუფლებაზე. კომისიაზე მეტ-ნაკლებად ვთანხმდებით, რომ პირველ რიგში, შემდეგი არჩევნები იყოს პირდაპირი წესით და შეიცვალოს შემდეგი საპრეზიდენტო არჩევნები არაპირდაპირი წესით. სწორედ იმიტომ მოხდა ეს ყველაფერი, რომ ბატონ გიორგი მარგველაშვილს არ დაეწყო პოლიტიკური სპეკულირებები. პრეზიდენტს ერთგვარად ეწყინა, რომ ჩვენ პირდაპირ არაპირდაპირი წესით არ დავნიშნეთ და მხარს არ ვუჭერთ მიდგომას, რომ მომავალი საპრეზიდენტო არჩევნები იყოს არაპირდაპირი წესით. ეს მოლოდინი რომ არ გაუმართლდა, მაინც ამ სპეკულაციით წავიდა რაც არ უნდა სამწუხარო იყოს",- განაცხადა სესიაშვილმა.
შეგახსენებთ, გუშინ პრეზიდენტმა განაცხადა, რომ საკონსტიტუციო კომისია პრეზიდენტის არჩევითობასთან დაკავშირებით გადაწყვეტილებას კონკრეტულ პოლიტიკოსთან მიმართებაში იღებს. პრეზიდენტი ამბობს, რომ პრეზიდენტის არჩევის უფლება ქართველ ხალხს არ უნდა წაერთვას.
