„როგორც იურისტი, დაველოდები გადაწყვეტილებას, რადგან ძალიან მაინტერესებს დასაბუთების ნაწილი,“ - ახალგაზრდა იურისტთა ასოციაციის თავმჯდომარე, ანა ნაცვლიშვილი, რუსთავი2-ის თაობაზე უზენაესი სასამართლოს გადაწყვეტილებას არჩევანის პირდაპირ ეთერში აფასებს.
მისი თქმით, როგორც მოქალაქეს, სასამართლო პროცესის მიმართ მინიმალური რწმენა აქვს და აღნიშნავს, რომ დემოკრატიის უმთავრეს ინსტიტუტზე, მედიასა და სასამართლო ხელისუფლებაზე მოხდა დარტყმა.
„ამ პროცესს არ ჰქონდა მინიმალური ნდობაც კი საზოგადოების ძალიან ფართო ნაწილი მხრიდან იმიტომ, რომ როგორც პირველ ინსტანციაში, ასევე მეორე ინსტანციაში მოხდა არაერთი ძალიან საეჭვო გარემოება, რომლის პიკი იყო განჩინება, რომელშიც პირდაპირ ჩაიწერა, რა იყო ამ ყველაფრის მიზანი და შეცდომით გაეპარათ, რომ მიზანი იყო სარედაქციო პოლიტიკის ცვლილება“, - განაცხადა ანა ნაცვლიშვილმა და აღნიშნა, „ასეთი უსამართლო გზით სამართლიანობის აღდგენა შეუძლებელია“.
2017 წლის 2 მარტს საქართველოს უზენაესი სასამართლოს დიდმა პალატამ ტელეკომპანია "რუსთავი 2"-ის 60 პროცენტი ქიბარ ხალვაშს, 40 კი - შპს "პანორამას" მიაკუთვნა. ტელეკომპანიის იურისტები, გადაწყვეტილების შეჩერების თაობაზე, ადამიანის უფლებათა ევროპულ სასამართლოში განაცხადს შეიტანენ. გენერალური დირექტორის ნიკა გვარამიას განცხადებით, უზენაესი სასმართლოს დიდი პალატის გადაწყვეტილება ასევე ავტომატურად გაუქმდება, თუ საკონსტიტუციო სასამართლო რუსთავი 2-ის სარჩელებს დააკმაყოფილებს.