პროპორციულ საარჩევნო სისტემაზე გადასვლის შემთხვევაში, გადაუნაწილებელი მანდატები პირველ ადგილზე გასულ პარტიას ექნება, ფაქტიურად ეს არის ულტიმატუმი, - განაცხადა საპარლამენტო უმცირესობის წევრმა ხათუნა გოგორიშვილმა მმართველი გუნდის ხედვების შეფასებისას. მისი თქმით, არგუმენტად ის დასახელდა, რომ პირველ ადგილზე გასულ პარტიას მთავრობის ფორმირების საშუალება უნდა ჰქონდეს.
,,ძალიან უცნაური ფაქტის მომსწრე გავხდით. ფაქტიურად ეს ალბათ არის ულტიმატუმი. როგორც პარლამენტის თავმჯდომარემ გვამცნო, თუკი საუბარი იქნება პროპორციულ საარჩევნო სისტემაზე და მაჟორიტარული სისტემის გაუქმებაზე, ასეთ შემთხვევაში, გადაუნაწილებელი მანდატები პირველ ადგილზე გასულ პარტიას უნდა ჰქონდს. ეს არის ერთადერთი საშუალება იმისა, რომ ხელისუფლება მაჟორიტარულ სისტემას შეელიოს. აღნიშნული წინადადება ნიშნავს შემდეგს: „ქართულმა ოცნებამ“ საპარლამენტო არჩევნებში ხმების 48%-ით საპარლამენტო მანდატების 78% აიღო. შემოთავაზებული სისტემით ხმების 48%-ით მანდატების 73%-ს მიიღებს. განსხვავება არის, მაგრამ არა ისეთი, რომ პოლიტიკურ კონსენსუსად და პოლიტიკურ შეთანხმებად განვიხილოთ”, - განუცხადა ჟურნალისტებს გოგორიშვილმა და იმედი გამოთქვა, რომ მმართველი გუნდის ამ ინიციატივას პოლიტიური პარტიების მხრიდან აქტიური წინააღმდეგობა მოჰყვება.
სახელმწიფო საკონსტიტუციო კომისიის წევრებს დღეს პარლამენტის თავმჯდომარემ საკონსტიტუციო რეფორმასთან დაკავშირებით მმართველი გუნდის ხედვა გააცნო.