საქართველოს მთავრობამ დევნილთა მიმართ 2017-18 წლებში სახელმწიფო სტრატეგიის განხორციელების სამოქმედო გეგმა დაამტკიცა. სოზარ სუბარის განმარტებით, გეგმა უმთავრესად ითვალისწინებს დევნილთა საცხოვრებელი სახლებით დაკმაყოფილებას და დახმარებას, რათა მათ გაუჩნდეთ საკუთარი შემოსავლები.
„მიმდინარე და მომავალ წელს დაგეგმილია მინიმუმ 4 000 საცხოვრებელი ბინის გადაცემა. ამაში იგულისხმება როგორც სოფლის სახლი, ახლადმშენებარე ბინები, ისე იპოთეკარებისთვის დახმარება. იმ რეფორმის გატარების შემთხვევაში, რომელსაც ჩვენ ვაპირებთ, ეს ციფრი 2 წელიწადში შეიძლება გასამმაგდეს და გაოთხმაგდეს კიდეც. ერთადერთი მიმართულება, რაშიც დაფინანსებას ვამცირებთ, ეს არის რეაბილიტაციები დევნილთა საცხოვრებლებისთვის, ძველი სახლების იმიტომ, რომ როგორც წესი, რეაბილიტაცია იმდენივე ჯდება, რაც ახალი საცხოვრებლის მშენებლობა, ხოლო შედეგი ვერასდროს ვერ არის ის, რაც ახალი კორპუსი“, - განაცხადა სუბარმა.
როგორც ცნობილია, სამინისტროში დაგეგმილი რეფორმის თანახმად, დაგეგმილია დევნილთა 45 ლარიანი დახმარების შეწყვეტა გარკვეულ კატეგორიებზე.
