რაც პარტია დაარსდა, არც ერთი თეთრი არ მაქვს აღებული, - განაცხადა ”პაატა ბურჭულაძე - სახელმწიფო ხალხისთვის” ლიდერმაპარტიის მცხეთის შტაბის ყოფილი ხელმძღვანელის მიერ გამოთქმული ბრალდების საპასუხოდ.
პაატა ბურჭულაძის განცხადებით, გიორგი ლაპენაშვილი ის ადამიანია, ვინც ცოტა ხნის წინ მიატოვა „ქართული ოცნება“ და გადმოვიდა მათ პარტიაში. მისი თქმით, ის განაწყენებულია, რადგან არ წარადგინეს მაჟორიტარად.
,,მე ერთი თეთრიც არ მაქვს აღებული მას შემდეგ, რაც პარტია დაარსდა. ეს აუდიტის სამსახურმაც იცის. შეგიძლიათ გადაამოწმოთ. პირიქით, გეტყვით, რომ 60 000-ლარიანი შემოწირულობა გავაკეთეთ მე, ჩემმა შვილებმა და რძალმა პარტიაში. მე, მაქსიმალური შემოწირულობა გავაკეთე ჩემს პარტიაში, აქედან გამომდინარე, ყველაფერი არის სიყალბე”, - განაცხადა პაატა ბურჭულაძემ.
რაც შეეხება თანხას, რომელზეც ლაპენაშვილი საუბრობს, ბურჭულაძემ აღნიშნა, რომ მათი შემოწირულობა გაკეთდა მოძრაობა ”პაატა ბურჭულაძე სახელმწიფო ხალხისთვის” ანგარიშზე და ყველაფერი შემოწმებულია აუდიტის სამსახურის მიერ.
კოორდინატორებსა და მხარდამჭერებს კი ბურჭულაძე ანაზღაურებას 8 ოქტომბრის შემდეგ პირდება.
”შემოვიარე მთელი საქართველო. ვუთხარი ჩვენს მხარდამჭერებს, რომ ჩვენ არ გვაქვს საშუალება, ყველა გზა გადაკეტილია და ვისაც შეგიძლიათ დარჩით. ცხოვრება 8 ოქტომბერს არ მთავრდება. პირიქით, 8 რიცხვიდან იწყება ჩვენი პარტიის ცხოვრება და ვინც ჩემთან, ჩვენს გვერდში დარჩება, არ ვაწყენინებთ, შეძლებისდაგვარად ავუნაზღაურებთ ყველაფერს”, - განაცხადა პაატა ბურჭულაძემ.
