გორის მაჟორიტარი დეპუტატობის კანდიდატი ირაკლი ოქრუაშვილი გორში მომხდარ ინციდენტთან დაკავშირებით ირაკლი კობახიძის განცხადებას ეხმაურება და აცხადებს, რომ ეს იყო ,,საკმაოდ ცინიკური, უპასუხისმგებლო და არასახელმწიფოებრივი“.
მისი თქმით, შემთხვევა მოხდა ,,ქართული ოცნების აქტივისტების ინსპირირებით.
,,მათი აქტივისტები მონაწილეობდნენ და ამიტომ დაბრალდა „ქართულ ოცნებას“ და არა სხვა რომელიმე პარტიას. მე ვისურვებდი, „ქართული ოცნების“ ლიდერებმა ცოტა მეტი ფილტრი გაუკეთონ თავიანთი წარმომადგენლების განცხადებებს და მოიკითხონ მაინც დაჭრილები. მე, გუშინ 19.20 საათზე გავაკეთე განცხადება. მომხდარი ფაქტიდან ამ დრომდე მმართველი გუნდის მხრიდან რომ ყოფილიყო რაიმე ტიპის კომუნიკაცია, მოკითხვა მაინც, რა მოხდა და რაიმე ხომ არ გვჭირდებოდა, შესაძლოა, მე გაცილებით კონსტრუქციული ვყოფილიყავი“, - აცხადებს ოქრუაშვილი.
ექსმინისტრის განცხადებით, იმის მიუხედავად, რომ თავად ბევრი რესურსი გააჩნია, ჯერჯერობით არ ცდილობს რაიმე მოქმედებების დაწყებას ბრალდებულის ადგილსამყოფელის დასადგენად და დასაკავებლად. ოქრუაშვილი ამბობს, რომ პოლიცისთვის წამმზომი ჩართულია.
,,მათ დრო ეწურებათ. ეს დრო კი, ლოგიკურად არჩევნების დღეს იწურება. თუ ამ დღემდე, 8 ოქტომბრამდე არ იქნება ბრალდებული დაკავებული, ეს იქნება გზავნილი ასეთი ტიპის სხვა ადამიანების მიმართ, რომლებიც ჩართულები არიან „ქართული ოცნების“ კამპანიაში – ნუ გეშინიათ ბიჭებო, ყველაფერი კარგად იქნება. მაგრამ თუ მათთვის იქნება ყველაფერი კარგად, მე შეიძლება ვიმოქმედო ჩემი წესებით, ჩემი რესურსებით მათ წინააღმდეგ. თუ ეს ყველაფერი გადაიზრდება არასასურველ შედეგებში, მე პასუხისმგებლობას ვიხსნი“, - განაცხადა ოქრუაშვილმა.